Ikipe ya Rayon Sports kuri uyu wa Gatatu tariki ya 08 Werurwe, yatangaje ko yafashe icyemezo cyo gusezera mu gikombe cy’Amahoro cya 2023, iba ikipe ya gatatu igisezeyemo.
Ni amakuru Perezida w’iyi kipe, Captain (Rtd) Uwayezu Jean Fidèle yemereje mu kiganiro yagiranye n’abanyamakuru kuri uyu wa Gatatu.
Rayon Sports ni imwe mu makipe yari yitabiriye Igikombe cy’Amahoro, ndetse yari yashoboye gutsinda Intare FC ibitego 2-1 mu mukino ubanza wari wabereye i Shyorongi mu cyumweru gishize.
Kuri uyu wa Gatatu ni bwo amakipe yombi yagombaga guhurira mu mukino wo kwishyura wari kubera kuri Stade ya Bugesera Saa sita n’igice.
Rayon Sports yafashe icyemezo cyo gusezera nyuma yo kubwirwa ko uyu mukino utakibaye habura amasaha abiri ngo ube.
Ubuyobozi bw’iyi kipe bwamenye amakuru y’uko umukino utakibaye mu gihe abakinnyi bari mu modoka bava mu mujyi wa Kigali bajya gukina na Intare FC.
Rayon Sports nk’ikipe yagombaga kwakira umukino yabwiwe ko utakibaye, mu gihe Ikipe bagombaga guhura yari yamaze kumenya ariya makuru ndetse abakinnyi bayo bibereye ku i Rebero mu mujyi wa Kigali.
FERWAFA mu butumwa yari yageneye amakipe yombi yari yasobanuye ko yafashe kiriya cyemezo nyuma yo gusanga Stade ya Bugesera yari kwakira imikino ibiri kuri uyu wa Gatatu, kandi nta matara igira ku buryo yashoboraga kwitabazwa mu gihe byari kuba ngombwa ko hiyambazwa iminota ya kamarampaka.
Perezida Uwayezu Jean Fidèle mu kiganiro n’itangazamakuru yavuze ko ibyo FERWAFA yabatuyeho batabishobora, ikaba impamvu nyamukuru bafashe icyemezo cyo gusezera.
Yagize ati: “Nka Rayon Sports turifuza ko amategeko y’ubuyobozi aciye mu mucyo yajya yubahirizwa, ibyo badutuyeho ntitwabishobora, Igikombe cy’Amahoro bwafashe icyemezo cy’uko ikipe ya Rayon Sports bukiyikuramo. Twandikiye FERWAFA twabibamenyesheje, ubwo abo twari gukina bakomeze, uko bazabigenza ni bo bakuzi.”
Uwayezu yunzemo nko nka Rayon Sports bifuza ko imigendekere y’Umupira w’Amaguru mu Rwanda inozwa, ikagendera ku mategeko.
Rayon Sports yasezeye mu Gikombe cy’Amahoro yiyongera ku makipe ya AS Kigali na Gasogi United yo yanze kucyitabira.
