APR FC yasezereye Ivoire Olympic nyuma yo kuyitsinda igitego 1-0 bituma inakomeza muri ¼ cy’irangiza mu mikino y’Igikombe cy’Amahoro 2023.
Igitego kimwe rukumbi cyatsinzwe na Ishimwe Christian kuri ‘coup franc’ yatereye kure cyane maze umuzamu akayifata yarenze umurongo, ni cyo cyakoze icyinyuranyo muri uyu mukino.
Mu mukino wabanje iyi kipe ya Ivoire Olympic yari yahagamye APR FC nyuma yo gukinisha abakinnyi badasanzwe babanza mu kibuga.
Muri uyu mukino, APR FC yari yagerageje gukora ku bakinnyi bayo bakomeye basanzwe babanza mu kibuga uretse Nshimiyimana Yunusu na Ishimwe Anicet.
Mu yindi mikino yabaye Etincelles FC yaguye miswi 0-0 na Marines FC kuri Sitade Umuganda bituma Marines FC ikomeza muri ¼ ku giteranyo cy’ibitego 3-1 yari yatsinze mu mukino ubanza.
Ku rundi ruhande, Musanze FC yatsinze Bugesera FC ibitego 2-0 kuri Sitade Ubworoherane mu Karere ka Musanze bituma inakomeza muri ¼ nyuma y’uko izi kipe zari zaranganyije mu mukino ubanza wabereye mu karere ka Bugesera.
Ibi byatumye muri ¼ cy’irangiza APR FC izahura na Marines FC, Mukura VS izahura na Musanze FC, Rwamagana FC izahura na Kiyovu Sports.
Undi mukino wa ¼ utegerejwe ni uwo Police FC izahuramo na Intare FC nyuma y’uko Rayon Sports byari guhura uyu munsi itangaje ko yikuye mu irushanwa kubera ibyo Perezida wayo Uwayezu Jean Fidèle yise akavuyo mu mitegurire, nyuma yo kumenyeshwa ko umukino wayo wimuye mbere ho amasaha abiri gusa.
