Polisi y’u Rwanda (RNP) yakajije umurego mu kurwanya ubujura kandi ita muri yombi abasore babarirwa mu magana bakekwaho kugira uruhare muri ibyo bikorwa by’ubugizi bwa nabi .
Assistant Commissoner of Police (ACP) Desire Gumira, Umuyobozi wa Polisi mu gice cyo mu gihugu hagati, kuri uyu wa Mbere ushize yemeje ko hafashwe urubyiruko rufite hagati y’imyaka 20 na 30.
Nk’uko polisi ibitangaza, ngo byibuze urubyiruko 800 rwagize uruhare mu bujura rwatawe muri yombi mu mezi abiri ashize mu mijyi yo hirya no hino mu gihugu, abenshi muri bo bakaba bari mu Mujyi wa Kigali.
Uyu muhigo uje mu rwego rwo gusubiza umuhamagaro w’abaturage wo gukemura ibibazo by’ubujura bikomeje kwiyongera mu gihugu. Benshi mu rubyiruko rwatawe muri yombi bivugwa ko ari abaretse ishuri, mu gihe bamwe bari barigeze kunyura muri gahunda zo kubasubiza mu buzima busanzwe ariko bagasubira mu myitwarire y’ubugizi bwa nabi nyuma yo gusubira muri sosiyete.
Gumira yashimangiye akamaro ko gutanga amakuru ku gihe ku bantu bakekwa ndetse n’ahantu h’ubujura bujyanye no kwiba vuba. Yagaragaje ko urubyiruko rwatawe muri yombi wasangaga rutuye mu baturage, mu ngo z’abantu cyangwa abaturanyi, anagaragaza ko badafite uburyo bwemewe bwo kwinjiza amafaranga nubwo bakoresha amafaranga menshi mu kunywa inzoga cyangwa mu gukodesha inzu babamo.
Ati: “Tugomba kubabaza aho bakura amafaranga yo kunywa inzoga cyangwa gukodesha nyamara badakora kugirango babone amafaranga. Nicyo gikorwa cy’ibanze cyo kubakeka ”.
Gumira yakomeje yizeza abaturage ko abapolisi n’abandi bashinzwe umutekano bakurikiranira hafi urubyiruko rwishora mu bujura, anashishikariza itangazamakuru kugira uruhare mu gusangiza amakuru ku hantu bikekwa ko hakorerwa ibyo bikorwa.
Umuvugizi wa Polisi, CP John Bosco Kabera, yongeye gushimangira ubwitange bwa polisi mu gukemura ubujura n’ibindi bikorwa binyuranyije n’amategeko, anasaba ko habaho ubufatanye no guhana amakuru ku gihe ku bantu bakekwaho ibyaha n’udutsiko tw’abanyabyaha.
Kabera yagize ati: “Turizeza abaturage ko ikibazo cy’ubujura gikemurwa kandi Polisi ikaba yarongereye ibikorwa byo kukirwanya kimwe n’ibikorwa byose binyuranyije n’amategeko. Ni inshingano za polisi zo kurinda umutekano w’abantu n’umutungo wabo”.
Yasabye kandi abaturage kumenyesha polisi ibegereye cyangwa babinyujije mu itumanaho rya RNP ndetse no ku mbuga nkoranyambaga kugira ngo babone ibisubizo byihuse.
Kabera yagiriye inama abagize uruhare mu bikorwa by’ubugizi bwa nabi kwirinda imyitwarire nk’iyo ahubwo bagakora business zemewe n’amategeko, mu kwirinda ko bafungirwa impamvu zishobora kwirindwa.
Mu mategeko y’u Rwanda, ubujura buhanishwa igifungo kuva ku mwaka umwe (1) kitarenze imyaka ibiri (2), n’ihazabu y’amafaranga atari munsi ya miliyoni 1 kandi atarenga miliyoni 2, imirimo ifitiye igihugu akamaro mu gihe cy’amezi atandatu (6), cyangwa ibi bihano byombi.
Igihano cyikuba kabiri iyo ubujura bwakozwe binyuze mu kwangiza, kurira, cyangwa gutunga urufunguzo rwibwe, niba ubujura bwarakozwe nijoro, cyangwa niba ubujura bwarakozwe n’abantu barenze umwe (1).
Ubujura bukabije buhanishwa igihano cy’igifungo hagati y’imyaka itanu n’irindwi, n’ihazabu y’amafaranga ari hagati ya miliyoni 3 na miliyoni 5.
