Guverineri w’intara ya Kivu y’Amajyaruguru mu rwego rw’igisirikare, Lt Gen. Constant Ndima, arashinja ingabo ziri mu mutwe w’umuryango wa Afurika y’iburasirazuba (EAC) kutagenzura neza ibice zahawe.
Kuva tariki ya 17 Mata 2023, ubuyobozi bw’iyi ntara bwatembereje abanyamakuru mu bice umutwe witwaje intwaro wa M23 washyikirije ingabo za EAC ngo zibigenzure.
Aba banyamakuru basoje urugendo rwabo ku wa 21 Mata, bagirana ikiganiro n’ubuyobozi bw’iyi ntara bwari buhagarariwe na Guverineri Ndima ndetse n’ubw’ingabo za EAC bwari buhagarariwe na komanda wazo, Maj. Gen. Jeff Nyagah.
Muri iki kiganiro cyabereye mu mujyi wa Goma, Lt Gen. Ndima yemeje ko hari ibice ingabo za EAC zari zarahawe byisubijwe na M23, agaragaza ko atabyishimiye. Ati: “Ingabo ziri mu butumwa zari zaragiyeyo ariko M23 yarahisubije. Tubabajwe n’uko M23 itari kubahiriza imyanzuro ya Nairobi. Gusubira inyuma kwa M23 kugenda gake.”
Maj. Gen. Nyagah yasobanuye ko abarwanyi ba M23 bamaze kuva mu bice basabwe kuvamo ku kigero cya 80%. Ati: “Ntabwo navuga ko hose bahavuye. Hari abakiri Kibumba, Rugari, Rutshuru, Bunagana, Mabenga, ariko ntibakiri Sake, Nenero, Mushaki, Kitshanga, Mweso, Kibirizi n’ahandi. Ndabahamiriza ko M23 byibuze M23 yamaze kuva muri 80%. Gusubira inyuma ni urugendo.”
Leta ya RDC yifuza ko abarwanyi ba M23 bakabaye baramaze kuva mu bice byose bafashe, ubu bakaba bari muri zone ya Sabyinyo bahozemo mbere yo gutangira imirwano.
