Urwego rw’igihugu rw’ubugenzacyaha (RIB) rugaragaza ko urwego rw’ubuvuzi ari rwo rufite abantu benshi baketsweho gukoresha impamyabumenyi mpimbano kuva muri Nyakanga 2020 kugeza muri Mata 2023.
Imibare ya RIB, nk’uko The New Times yabitangaje, igaragaza ko muri ibi bihe hafashwe abantu 75 bakoresha izi mpamyabumenyi, barimo abaforomo n’ababyaza 44, abo mu burezi ni 9, ba enjenyeri 5, abasigaye bari mu zindi nzego.
Abafashwe benshi ni 62 bakoreshaga impamayabumenyi y’icyiciro cya kabiri cya kaminuza, hagakurikiraho 8 bakoreshaga izisoza amashuri yisumbuye, 3 bakoreshaga iz’icyiciro gihanitse cya kaminuza na 2 bakoreshaga impamyabumenyi y’ikirenga.
Umuvugizi wa RIB, Dr Murangira Thierry, yasobanuye ko ifatwa rya benshi bo mu rwego rw’ubuvuzi ryatewe n’ubugenzuzi bukomeye bwakorewemo, ugereranyije no mu zindi nzego zabonetsemo bake.
