Mu mudugudu wa Murambi, akagari ka Kabaya, umurenge Kagogo mu karere ka Burera hakomeje igikorwa cyo gushakisha umugabo witwa Sembagare Faustin, uherutse kwicwa n’inkangu yatewe n’imvura nyinshi.
Umusozi Sembagare yari atuyeho waridutse mu gihe imvura nyinshi yagwaga mu ijoro ryo ku wa 2 rishyira uwa 3 Gicurasi 2023, utwara inzu, we n’abandi bari bayirimo.
Abandi bo muri uyu muryango batwawe n’iyi nkangu ni: Nyirandikubwimana Esther, Ndayishimiye, Mbarushimana na Uwitunze Clemence. Muri aba harimo abana batatu ba Sembagare n’umwuzukuru we.
Imirambo y’aba bana batatu n’umwuzukuru yahise iboneka ndetse tariki ya 4 Gicurasi 2023, ku bufatanye n’ubuyobozi kugeza kugeza kuri Guverineri w’intara y’Amajyaruguru, Nyirarugero Dancille, habaye umuhango wo kuyishyingura.
Ibiro by’intara y’Amajyaruguru byatangaje ko mu gihe hari hagiye kuba umuhango wo gushyingura, umurambo wa Sembagare wo utari wakabonetse. Byagize biti: “Imibiri ishyingurwa ni iya: Nyirandikubwimana Esther, Ndayishimiye, Mbarushimana na Uwituze Clemence, bose bo mu muryango wa Sembagare Faustin, bari batuye mu Murenge wa Kagogo, Akagari ka Kabaya, Umudugudu wa Murambi. Ni mu gihe kandi umubiri wa Sembagare ugishakishwa mu bitengu.”
Ikigo cy’igihugu cy’itangazamakuru kuri uyu wa 7 Gicurasi 2023 cyatangaje ko kugeza ubu umurambo wa Sembagare ugishakishwa, ubu abari mu gikorwa cyo kuwushakisha bakaba batangiye gukoresha imashini isanzwe yifashishwa mu gukora imihanda.
Iki kigo cyagize kiti: “Ibikorwa byo kumushaka bimaze iminsi bikorwa n’abaturage, bakoresheje amasuka ariko ntacyo byatanze. Kuri iki Cyumweru hitabajwe imashini kugira ngo zibashe gukuraho uyu musozi.”
Imvura yo mu ijoro ryo ku wa 2 rishyira uwa 3 Gicurasi yaguye mu bice bitandukanye by’igihugu, cyane cyane mu ntara y’Uburengerazuba, Amajyaruguru n’Amajyepfo. Guverinoma y’u Rwanda iremeza ko abishwe n’imyuzure n’inkangu byayiturutseho ari 131.
