Guverinoma ya Malawi yatangaje ko iy’u Rwanda yayisabye Abanyarwanda 55 ikekaho kugira uruhare muri jenoside yakorewe Abatutsi mu 1994, kugira ngo bagezwe mu butabera.
Nk’uko ikinyamakuru Barrons kibitangaza, Minisitiri ushinzwe umutekano w’imbere muri Malawi, Ken Zikhale Ng’oma yahishuye aya makuru kuri uyu wa 5 Kamena 2023 ubwo yari mu kiganiro n’abanyamakuru i Lilongwe.
Minisitiri Ng’oma ati: “U Rwanda rwasabye guverinoma yaa Malawi kurufasha kumenya abantu 55 bihishe muri Malawi. Aba bantu bazwi nka ba ‘warlords’.”
Uyu muyobozi yasobanuye ko ibyaha aba bantu bakurikiranweho bifitanye isano n’imfu z’abantu barenga 2000 bapfiriye mu nsengero mu gihe cya jenoside yakorewe Abatutsi mu mwaka w’1994.
Aya makuru amenyekanye nyuma y’aho Minisiteri y’umutekano muri Malawi itangaje ko igiye kwirukana impunzi hafi 400 zirimo Abanyarwanda, Abarundi n’Abanyekongo. Bikekwa ko muri aba harimo abagize uruhare muri jenoside.
