Perezida Yoweri Kaguta Museveni wa Uganda yanyomoje amakuru avuga ko yaba ari gukurikiranirwa n’abaganga ahavurirwa indembe mu bitaro (ICU), ashyira mu majwi abanya-Kenya.
Kuva mu cyumweru gishize Museveni yishyize mu kato nyuma y’uko bigaragaye ko yanduye icyorezo cya COVID-19.
Uburwayi bwakurikiwe n’inkuru zitandukanye zivuga ku buzima bwe, ku buryo hari bamwe mu bakoresha imbuga nkoranyambaga bagiye kure bakavuga ko urupfu rurimo kumugera amajanja.
Museveni mu butumwa yageneye abaturage b’igihugu cye mu rwego rwo kubagaragariza uko amerewe, yavuze ko atigeze ajyanwa muri ICU.
Ati: “Nabonye abantu bake ntekereza ko ari abo muri Kenya bavuga ko nari muri ICU, n’ibindi. Iyo nza kuba ndi muri ICU, Guverinoma yari kubimenyesha igihugu. Ni iki cyo guhisha? Gusa sinigeze njya mu buriri nk’umugabo urembeye mu rugo, usibye kuryama bisanzwe; biri kure yo kuryama ku gitanda cyo mu bitaro, haba muri ICU cyangwa ahandi.”
Museveni yavuze ko yatangiye kumererwa neza ugereranyije n’uko yari amerewe hagati yo ku wa Gatatu no ku wa Gatanu w’icyumweru gishize, ku buryo yanatangiye gukora akazi ke bisanzwe.
Yavuze ko isuzuma ryakozwe ku Cyumweru ryagaragaje ko akirwaye, gusa yizeza abanya-Uganda yasabye gukomeza kumusengera ko azatsinda kiriya cyorezo.
