Mu gukora ubushakashatsi ku bisekuruza by’abanyapolitiki bo muri Amerika, isuzuma ryakozwe na Reuters ryerekanye ko kimwe cya gatanu cy’abagize kongere y’igihugu, ababaye perezida bakiriho, abacamanza bo mu rukiko rw’ikirenga na ba guverineri bakomoka mu buryo butaziguye ku bakurambere bagize Abirabura abacakara babo .
Mu bantu 536 baheruka babaye muri Kongere, Reuters, yemeje ko nibura 100 bakomoka ku bantu bari batunze abacakara. Muri iryo tsinda, abarenze kimwe cya kane cy’abagize Sena, abagera kuri 28, ukurikiranye ibisekuru byabo usanga harimo abari batunze abacakara.
Abo badepite bo mu nama ya 117 ya Kongere ni Abademokarate n’Abarepubulikani. Harimo bamwe mu banyapolitiki bakomeye muri Amerika: abasenateri b’Abarepubulikani nka Mitch McConnell, Lindsey Graham, Tom Cotton na James Lankford, n’Abademokarate nka Elizabeth Warren, Tammy Duckworth, Jeanne Shaheen na Maggie Hassan.
Byongeye kandi, Perezida Joe Biden na buri muntu wahoze ari perezida wa Amerika ukiriho, usibye Donald Trump, bakomoka mu miryango yakoresheje abacakara nka: Jimmy Carter, George W. Bush, Bill Clinton na Barack Obama binyuze ku ruhande rwa nyina w’umuzungukazi. Abakurambere ba Trump bageze muri Amerika ubucakara bwaramaze gucibwa.
Babiri muri icyenda bagize Urukiko rw’ikirenga rwo muri Amerika, Amy Coney Barrett na Neil Gorsuch, nabo bafite abakurambere batunze abacakara.
Reuters yasanze kandi mu 2022, ba guverineri bo muri leta 11 muri 50 bakomoka ku miryango yakoreshaga ubucakara. Harimo ba guverineri umunani bo muri leta 11 zatangije Leta Zunze Ubumwe za Amerika, zarwanye intambara yo kugumishaho ubucakara.
Babiri muri bo barashaka kuzaba abakandida b’ishyaka ry’Abarepubulikani ku mwanya wa perezida: Asa Hutchinson wahoze ari Guverineri wa Arkansas, na Doug Burgum wo muri Dakota y’Amajyaruguru.
Carolina y’Amajyepfo, aho intambara y’abenegihugu yatangiriye, irerekana isano y’umuryango hagati y’intore za politiki z’Abanyamerika n’amateka y’igihugu y’ubucakara. Buri munyamuryango w’intumwa za leta z’abantu icyenda muri kongere iheruka afitanye isano n’aya mateka binyuze mu basekuruza be.
