Ikigo cy’amabuye y’agaciro, peteroli na gaz mu Rwanda (RMB) kiratangaza ko amabuye y’agaciro yoherejwe mu mahanga hagati ya Mata na Kamena 2023 yinjije miliyoni zisaga 362 z’amadolari ya Amerika (hafi miliyari 426 z’amafaranga y’u Rwanda) .
Zahabu yoherejwe mu mahanga yonyine yinjije miliyoni zisaga 302 z’amadolari (hafi miliyari 356 z’amafaranga y’u Rwanda), bigaragara ko ari yo yinjije amafaranga menshi kurusha andi mabuye y’agaciro, arimo Gasegereti, coltan, wolfram, n’andi.
Muri kiriya gihe, amabuye y’agaciro yose yoherejwe mu mahanga yageze ku bilo 6,638.538, bifite agaciro ka $ 362.000.000 (Hafi miliyari 426 z’Amanyarwanda).
Ugereranije n’imibare hagati y’igihembwe cya mbere n’icya kabiri cya 2023, habayeho kwiyongera gutangaje kwa 46.4% kw’amafaranga ava mu mabuye y’agaciro yoherezwa mu mahanga ndetse no kwiyongera ku gipimo cya 12% mu ngano nk’uko byemezwa na RMB.
Toni zigera muri 4.7 za zahabu zoherejwe hanze zonyine zinjije miliyoni zisaga 302.6 z’amadolari muri rusange.
Hagati aho, igihugu cyohereje toni zirenga 1.144 za Gasegereti, zifite agaciro ka miliyoni zisaga 18.8 z’amadolari (hafi miliyari 22 z’amafaranga y’u Rwanda), muri icyo gihe kimwe.
Toni 254 za Coltan zoherejwe hanze zinjije miliyoni 27.8 z’amadolari (hafi miliyari 32,6 z’amafaranga y’u Rwanda), mu gihe toni zisaga 635 za wolfram zinjije miliyoni 8.4 z’amadorari (hafi miliyari 10 z’amafaranga y’u Rwanda).
Andi mabuye y’agaciro, apima toni 4.267, yinjije miliyoni zisaga 4.5 z’amadolari (hejuru ya miliyari 5.3 z’amafaranga y’u Rwanda) muri rusange.
Mu 2022, u Rwanda rwinjije miliyoni zisaga 772 z’amadolari avuye mu mabuye y’agaciro yoherejwe mu mahanga, akaba yariyongereye cyane ugereranyije na miliyoni 516 $ yinjiye mu 2021.
Mu rwego rwo kugera ku ntego zacyo zikomeye, igihugu gifite intego yo kugera kuri miliyari 1.5 z’amadolari ya Amerika azaba ava mu mabuye y’agaciro yoherezwa mu mahanga mu mwaka wa 2024. Kugira ngo ibyo bishoboke, guverinoma irashaka kureshya ishoramari mu bucukuzi bw’amabuye y’agaciro no kugira u Rwanda nk’ihuriro ry’akarere mu gutunganya no gucuruza amabuye y’agaciro.
