Umugabo washyize iterabwoba kuri Perezida Joe Biden hamwe n’abandi bayobozi abinyujije kuri interineti yarasiwe mu gitero cya FBI arapfa kuri uyu wa Gatatu, itariki 9 Kanama 2023.
Abakozi ba FBI ngo bageragezaga gushyikiriza uyu witwa Craig Robertson icyemezo cyo kumuta muri yombi bamusanze iwe muri Utah, amasaha make mbere y’uruzinduko ruteganijwe rwa Joe Biden muri iyi leta.
Ikirego cy’inshinjabyaha cyavugaga ko Robertson yashyize iterabwoba kuri Perezida Biden n’umushinjacyaha urimo gutegura ibyaha bishinja Donald Trump, abinyujije kuri Facebook .
FBI yanze gutanga ibisobanuro birambuye.
Igitero cyabaye mu masaha ya saa kumi n’ebyiri n’iminota 15 z’umugoroba i Provo, nko mu bilometero 65 mu majyepfo y’Umujyi wa Salt Lake City.
Ikirego cy’inshinjabyaha cyagaragaje ubutumwa Robertson yatanze kuri Facebook harimo n’amafoto y’imbunda n’iterabwoba ryo kwica Biden na Alvin Bragg, umushinjacyaha w’akarere ka Manhattan uyoboye iperereza ku kirego gishinja Donald Trump kwishyura uwahoze ari umukinnyi wa filimi z’urukozasoni kugirango azabigire ibanga.
Nk’uko iki kirego kibigaragaza, ubundi butumwa bwibasiye umushinjacyaha mukuru wa Amerika, Merrick Garland hamwe n’umushinjacyaha mukuru wa New York, Letitia James.
Robertson yanditse ku rubuga rwa Facebook ati: “Ndumva ngo Biden agiye kuza muri Utah. Ndi gucukumbura ikositimu yanjye ya ghillie ishaje no gukura umukungugu ku mbunda ya M24 ya sniper (mudahusha).”
Ni bumwe gusa mu butumwa bwinshi bubi buherekejwe n’amafoto y’intwaro byashyizwe kuri konti ya Facebook ya Robertson.
Ikirego kivuga ko Robertson yatangiye kwitabwaho cyane na FBI muri Werurwe nyuma yo gushyira iterabwoba kuri Bragg abinyujije ku rubuga nkoranyambaga rushya rwashinzwe na Trump rwitwa Truth Social. Iyi sosiyete ariko nubwo uyu ari umuyoboke wa Trump yahise ibimenyesha ishami rishinzwe ibikorwa by’iterabwoba muri FBI.
Abakozi ba FBI bahise basura ukekwaho icyaha, ababwira ko ibyo yashyize ku rubuga ari “inzozi” maze barangiza ikiganiro avuga ati: “Turarangije hano! Ntimuzagaruke mudafite icyemezo!”
Mu butumwa aheruka gushyiraho, Robertson yerekanyemo uko guhura kwe n’abakozi ba FBI, bumugaragaza yambaye imyambaro ya gisirikare ikoreshwa na ba mudahusha mu kwihisha kandi akanga abayobozi muri leta inshuro nyinshi.
Ubutumwa bwagumyeho kugeza ku wa Kabiri, ubwo yandikaga ati: “Ahari Utah izamenyekana muri iki cyumweru kuko ari ahantu mudahusha azakurira mu nzira Biden w’Umu-Marxist.”
Kuri uyu wa Kane, Perezida Biden azasura Utah bwa mbere nka perezida , asure ibitaro by’abasirikare bavuye ku rugerero ndetse yitabire n’igikorwa cyo gukusanya inkunga muri Park City.
