Amakuru ajyanye n’irangamimerere ryo kuva u Rwanda rwabona ubwigenge, ndetse n’andi yose yari akibitse mu nyandiko ziri mu mirenge yo hirya no hino mu Rwanda agiye gutangira kubikwa mu buryo bw’ikoranabuhanga bigizwemo uruhare n’Ikigo cy’Igihugu gishinzwe Ikoranabuhanga mu Itumanaho n’Isakazabumenyi (RISA). Ni umushinga witezweho kuzorohereza ibarurishamibare no kugera ku makuru mu nyandiko yari asanzwe abitse ahatandukanye.
Minisiteri y’Ikoranabuhanga no guhanga udushya, yahamagariye ba rwiyemezamirimo babishoboye gutangira ipiganwa rizarangira ku itariki ya 13 Nzeri 2023. Umushinga ugizwe n’ibice bine ari byo kwegeranya amakuru mu ikoranabuhanga no kuyageraho, gutangira serivisi za Leta mu ikoranabuhanga, udushya mu ikoranabuhanga no guhanga imirimo ndetse n’igice cyo gucunga imishinga.
Uyu mushinga uzaterwa inkunga ya miliyoni ijana z’Amadorali kuri buri muterankunga zizatangwa n’ibigo bibiri bitandukanye nk’inguzanyo. Ibigo bihuriye ku kuzatanga izi nguzanyo ni Banki y’Isi ndetse na Banki ishinzwe Ishoramari ry’Ibikorwa Remezo muri Aziya (AIIB).
U Rwanda rwari rwaratangije gahunda yo kwandika abana bavuka mu irangamimerere, mu buryo bw’ikoranbuhanga mu 2020. Intego yari uko mu mpera za 2022 abana bavuka mu gihugu hose baba bandikwa muri ubwo buryo ku kigero cya 100% nk’uko iyi nkuru dukesha KTRadio ikomeza ivuga.
Uyu mushinga uzakusanya kandi ubike neza amakuru yose y’irangamimerere, yo kuva mu 1962 u Rwanda rubona ubwigenge kugeza mu 2020, ubwo abana bavutse batangiraga kwandikwa mu ikoranabuhanga nk’uko byemezwa na RISA.
“Amakuru azashyirwa mu ikoranabuhanga azajya agerwaho binyuze mu buryo bwa ‘Civil Registration and Vital Statistics’, ajye akoreshwa mu gushakisha amakuru yanditse mu irangamimierere mu buryo bworoshye. Uyu mushinga witezweho kandi kugabanya ibitabo byinshi biri mu mirenge ndetse rimwe rimwe usanga bihateza umwanda n’akavuyo”.
Bivugwa ko nibura ibitabo hagati y’ibihumbi 40 na 45 bibitswe ahantu 418, bikaba bikubiyemo inyandiko zibarirwa hagati ya miliyoni 10 na 12.
Umushinga wo gushyira amakuru mu ikoranabuhanga ugamije koroshya uburyo bwo kubona amakuru na serivisi zitangirwa mu ikoranabuhanga, ndetse no gushimangira umujyo wo guhanga udushya mu ikoranabuhanga Igihugu cyashyizemo ingufu.
