Abaturage b’umurenge wa Gitambi mu karere ka Rusizi baravuga ko kimwe mu bibazo bibabangamiye cyane ari ingeso y’ubuharike n’ubushoreke ikomeza kugenda ifata indi ntera.
Abaturage bavuga ko abagabo bata abagore basezeranye bakajya gushaka abandi cyangwa bakagira abandi bagore ba rwihishwa, kimwe n’ababana badasezeranye.
Baganira na Bwiza.com, aba baturage bavuze ko iyi ngeso ibashegeshe cyane, abagore bakavuga ko iterwa n’inda nini y’abagabo bamwe batanyurwa n’ibiri mu ngo zabo bagasanga abakobwa cyangwa abagore b’abakire bakabaha ku mitungo baba bafite.
Abandi bakabiterwa no kutanyurwa n’abagore babo bakumva bahorana agatima karehareha mu bandi bagore, hakaba n’ababiterwa n’abagore b’ingare ngo babakubita, bagahitamo kubahunga bakishakira abandi.
Bamwe mu bagore baharitswe nabo babwiye Bwiza.com ko byabateye ibibazo byishi mu gihe bamwe mu bagabo na bo bavuga ko batinda gusezerana kuko iyo basezeranye abagore babasuzugura.
[xyz-ihs snippet=”google-pub”]
Utetiwabo Libérée w’imyaka 34, utuye mu mudugudu wa Karama, akagari ka Mashesha mu murenge wa Gitambi aratangaza ko umugabo amaze imyaka 2 yaramutaye akajya kwishakira undi mugore muri aka kagari, nyamara bari bamaranye imyaka 14 baranasezeranye.
Avuga ko umugabo atagiye burundu ahubwo agaruka ku mubuza amahoro amusahura n’ibyo bari barashakanye, akibaza impamvu ubuyobozi butamufatira ingamba zikaze.
Ati “amaze imyaka 2 yarantaye kandi twari dufitanye abana 3. Avuga ko yanjijije ubukene akajya kwishakira umugore ufite amafaranga kandi byangizeho ingaruka zikomeye cyane kuko nta kintu na kimwe amarira abana, nta na mituweli abatangira kandi nanjye nta bundi bushobozi mfite, gusa n’utwo mfite aragaruka akadusahura nk’umva mfite umutekano muke.’’
Nyiransekanabanga Théopiste utuye mu kagari ka Cyingwa,we avuga ko yari yaratwaye umugabo w’abandi yakwisuzuma agasanga ari mu makosa aramureka ariko na we yemeza ko ubuharike no kudasezerana ari ingeso zibasiye uyu murenge.
Aragira ati’’ umugabo twabanaga nari namwambuye undi mugore. Twari tumaze kubyarana abana 2 ariko narisuzumye nsanga mpemukira mugenzi wanjye n’abana be kuko umugabo yashoraga umutungo w’urugo rwe anzanira, nza gusanga nubwo abimpa ariko ndi mu byaha mpita mfata icyemezo cyo kureka umugabo w’abandi ubu mba njyenyine.’’
Bavuga ko iyi ngeso yangiza umuryango ku buryo bukomeye kuko usanga bahora mu ntonganya zidashira,bikagera no ku makimbirane akomeye ashobora no gutera kwamburana ubuzima.
Bamwe mu basore babana n’abagore batasezeranye na bo bavuze ko ari ibibazo bikomeye icyakora ko bagiye gusaba gusezerana n’abagore babo kugirango babane mu mutuzo,ariko ko ubukene n’ingeso mbi z’abagabo zo kwikunda biri mu bitera ibi byose.
Umuyobozi w’aka karere, Harelimana Frédéric, yasabye Gitifu mushya w’uyu murenge, Habimana Emmanuel guhangana n’iki kibazo.
Aragira ati’’ icya mbere tugusaba ni uguca ingeso mbi y’ubuharike iri muri uyu murenge. Irasenya ingo nyinshi kandi ntidushaka gukomeza kuyumva, ari yo mpamvu tugusabye guhangana na yo kugeza icitse burundu.’’
Habimana Emmanuel yavuze ko agiye kuyihashya afatanije n’abo bakorana n’abaturage mu mugoroba w’ababyeyi n’ahandi, bagacukumbura umuzi nyawo wayo, bakabona kuyihashya burundu.
Kanda hano ujye ubona amakuru yihuse kandi kugihe kuri Facebook no kuri twitter
Bahuwiyongera Sylvestre/Bwiza.com
