Komanda w’ibiro bikuru by’ingabo za Repubulika ya demukarasi ya Congo mu ntara ya Kivu y’Amajyaruguru, Colonel Yves Rubenga, yasobanuye uko abakomando bo mu mutwe w’ingabo zirinda abayobozi bakuru uzwi nka ‘GR’ bayoborwa na Colonel Mike Mikombe, babirukanye hanyuma bakarasa abasivili barenga 50.
Ni ubuhamya yatangiye mu rubanza rw’abasirikare barimo Col. Mikombe ushinjwa guha abasirikare ibwiriza ryo kwica abasivili bari mu myigaragambyo yo mu rukerera rwa tariki ya 30 Kanama 2023 hafi y’ikigo cya misiyo y’amahoro y’Umuryango w’Abibumbye (MONUSCO) mu mujyi wa Goma.
Uyu musirikare uyobora ibiro by’ingabo zisanzwe biri mu mujyi wa Goma, yasobanuriye urukiko uburyo we n’abasirikare be bagiye gukumira iyi myigaragambyo yamaganagana ingabo za MONUSCO, n’uko abakomando bo muri GR bababujije gukora akazi kabo mu buryo buboneye.
Colonel Rubenga yagize ati: “Colonel Mike Mikombe yaratwirukanye, ategeka abasirikare be kurasa. Bwana Perezida [w’iburanisha], ndasubiramo. We nyuma yo kutwirukana, yabwiye abasirikare be ‘Murase’! Buriya ku wa Gatandatu, nyuma yo kwirukana, amasasu yatangiye kuvuga. Nyuma yo gutanga ibwiriza ryo kurasa, yigiriye inama yo kuhava ari byose byari byamaze gukorwa maze ajya muri Jeep ye.”
Mu kwiregura, Colonel Mikombe yasobanuye ko ahubwo Rubenga ari we wateguye anategeka ishyirwa mu bikorwa ry’ubwicanyi bwakorewe abasivili kandi ngo hari ibimenyetso by’amafoto n’amashusho. Ngo ni na we wayoboye amatsinda abiri y’ingabo zajyanye imirambo y’abishwe mu buruhukiro bw’ikigo cya Katindo.
Muri rusange, hafunzwe abasirikare 6 barimo abofisiye bakuru babiri, ari bo Colonel Mikombe na Lieutenant Colonel Donatien Wawili. Nibahamwa icyaha, bazakatirwa igifungo cya burundu.
