Igisirikare cya Azerbaijan cyatangaje ko cyatangije “ingamba zo kurwanya iterabwoba” kigaba ibitero ku birindiro by’Ingabo za Armenia nyuma y’uko mine zihitanye abasirikare bane n’abasivili babiri mu rukerera rwo kuri uyu wa Kabiri mu gace ka Nagorno-Karabakh.
Iki gice kiganjemo abaturage bo mu bwoko bwa Armenia, giherereye muri Azerbaijan, cyabaye intandaro y’amakimbirane n’intambara hagati ya Azerbaijan na Armenia kuva mu mpera z’ubutegetsi bw’Abasoviyeti.
Minisiteri y’ingabo ya Azerbaijan mu murwa mukuru Baku yashinje urupfu rw’abo basirikare “Abanya-Armenia bashaka ubwigenge bwa Nagorno-Karabakh” ikirego Armenia yateye utwatsi ikavuga ko ari ubushotoranyi.
Itsinda ry’ingabo zishinzwe kubungabunga z’u Burusiya zigera ku 2000 zashyizweho nyuma y’uko Moscou igize uruhare mu guhagarika imirwano hagati ya Azerbaijan na Armenia mu 2020 bigaragara ko ritigeze rihagarika igitero cya gisirikare cya Azerbaijan.
Azerbaijan kandi yungukiwe ku nkunga ya gisirikare ituruka mu gihugu cya Turkiya, cyarushijeho kuziba icyuho gikomeye muri Caucase y’Amajyepfo mu gihe u Burusiya buhugiye ku ntambara yo muri Ukraine nk’uko iyi nkuru dukesha NPR ikomeza ivuga.
Baku ivuga ko intego y’iki gikorwa cya gisirikare, yatangiye kuri uyu wa Kabiri, ari “ukwambura intwaro no kwirukana” ingabo za Armenia zikorera mu buryo butemewe n’amategeko muri ako gace no kurinda abaturage bo mu bwoko bwa Azeris bo muri ako karere. Minisiteri y’ingabo ya Armenia ariko irahakana ko ingabo zayo zikorera muri kariya gace.
Kuri uyu wa Kabiri, mu murwa mukuru wa Nagorno-Karabakh, Stepanakert, humvikanye guturika kw’ibisasu mu gihe telephone zitari zirimo gukora neza.
