Komite Nyobozi y’Umuryango wa Kiyovu Sports ku wa Kabiri yafashe umwanzuro wo kwambura ikipe ’Company’ yari iyobowe na Mvukiyehe Juvenal, kubera amakosa yakoze yagiye agusha iriya kipe mu gihombo.
Kuwa Kabiri tariki ya 26 Nzeri 2023 nibwo habaye Inama ya Komite Nyobozi ya Kiyovu Sports yigaga ku ngingo ebyiri; zirimo imikoranire hagati y’Umuryango wa Kiyovu Sports ndetse na Kiyovu Sports Company LTD.
Ni inama yabaye mu gihe muri iyi kipe yo ku Mumena hari hamaze iminsi havugwa umwuka mubi hagati ya Juvenal wayoboraga Kiyovu Sports Company Ltd cyo kimwe na Ndorimana Franà§ois Régis ‘Jenerali’ wayoboraga Association ya Kiyovu Sports.
Komite Nyobozi ya Kiyovu Sports yatangaje ko inama yasanze Kiyovu Sports Company LTD iyobowe na Mvukiyehe Juvenal yarakoze amakosa yatumye ikipe ijya habi, bahitamo kuyambura ikipe by’agateganyo mu gihe bategereje Inteko Rusange izafata umwanzuro.
Aba bavuze ko kwambura Company inshingano zo gukomeza gucunga ikipe “Hashingiwe ko Kiyovu Sports Company LTD yagiye ikora amakosa anyuranye mu bihe bitandukanye kandi akagira ingaruka ku ikipe; gusesa amasezerano y’abakinnyi binyuranyije n’amategeko ikabihererwa ibihano na FIFA bingana na Miliyoni mirongo inani n’ibihumbi magana cyenda (80,900,000 Frw).”
Hashingiwe kandi “kuba itagishoboye gucunga ubuzima bwa buri munsi bw’ikipe n’abakozi bayo nk’uko bikubiye mu masezerano y’imikoranire Umuryango wagiranye na company.”
Izindi ngingo zashingiweho zirimo amikoro make yagaragajwe na Company ko itagishoboye gutunga ikipe ku buryo abakinnyi n’abakozi bamaze kugira ibirarane by’imishahara; ndetse no ngingo ya 5 y’amasezerano y’imikoranire hagati ya Kompanyi n’Umuryango.
Abagize Komite Nyobozi ya Kiyovu Sports “bemeje ko ibikorwa bya Siporo byose bya Kiyovu Sports bivanwa muri Kiyovu Sports Company LTD [yayoborwaga na Mvukiyehe Juvenal] bikaba bisubijwe by’agateganyo mu Muryango wa Kiyovu Sports [uyobowe na Jenerali] mu gihe hagitegerejwe ko Inteko Rusange iterana ikabifataho umwanzuro ntakuka.”
Amakuru avuga ko usibye arenga Frw miliyoni 80 Kiyovu Sports yaciwe izira gusezerera abakinnyi mu buryo bunyuranyije n’amategeko; hari n’andi Frw arenga miliyoni 153 iyi kipe yishyuzwa na Hoteli yayicumbikiraga mu mwaka ushize.
