FARDC yongeye kudutera yitwaje ibitwaro biremereye: Umuvugizi wa M23

M23 n’Ingabo za Guverinoma ya Repubulika Iharanira Demokarasi ya Congo, baramukiye mu yindi mirwano ikomeye kuri uyu wa Gatanu tariki ya 6 Ukwakira.

Ni umunsi wa gatatu impande zombi zirwana, nyuma yo kubura imirwano ku Cyumweru tariki ya 1 Ukwakira 2023.

Iminsi ibiri yakurikiyeho yaranzwe n’agahenge, mbere y’uko imirwano ikomeye yongera kubura ku wa Gatatu w’iki cyumweru n’ejo ku wa Kane.

Amakuru avuga ko imirwano hagati y’impande zombi yatangiye saa kumi n’ebyiri zo kuri uyu wa Gatanu, mu bice bya Tongo, Rushovu na Rushege biherereye chefferie ya Bwito, Teritwari ya Rutshuru.

Umuvugizi wa M23, Lawrence Kanyuka, yemeje amakuru y’iyi mirwano, avuga ko Ingabo za Guverinoma ya RDC ari zo zayitangije nyuma yo gutera M23 mu birindiro byayo.

Ku rubuga rwa X Kanyuka yunzemo ko abateye bari bitwaje “intwaro ziremereye.”

Hari amakuru avuga ko mu minsi itatu ishize M23 yaba yaratakaje tumwe mu duce yagenzuraga muri Teritwari ya Masisi, tukajya my biganza bya FARDC.

Kanyuka yavuze ko “bitandukanye na za propagande ndetse n’ibihuha biri ku mbuga nkoranyambaga, M23 iri kwirwanaho kinyamwuga.”