Inyeshyamba za Wazalendo zibumbiye mu kiswe Abakorerabushake baharanira Kurengera Igihugu (VDP-RDC) zirigamba kuba kuri ubu ziri kugenzura imidugudu n’imijyi bigera kuri 21.
Mu itangazo rigenewe abanyamakuru ku bijyanye n’imirwano ikomeje kubera muri Rutshuru, Masisi na Nyiragongo, izi nyeshyamba zavuze ko ziri mu ntambara zidatezemo izindi nyungu ahubwo ari ukwirengera kubw’ibyo ngo zikaba zidakeneye ko hari uwuzihamagarira guhangana na M23.
Zavuze ko kuva ku itariki ya 2 Ukwakira 2023 ziri “gukoma imbere ibitero bya M23, ndetse zongeraho ko iri gufatanya na, RDF na UPDF, bigamije kwigarurira Masisi mbere yo gufata Goma no gukomereza muri Kivu y’Amajyepfo.
Izi nyeshyamba ziravuga ko ziri gukoma imbere ibitero bya M23 mu gihe ku rundi ruhande bivugwa ko M23 ari yo irimo kugabwaho ibitero ku birindiro bitandukanye.
Muri iri tangazo rya Wazalendo ryashyizweho umukono na Jules Mulumba, baravuga ko ubu bari kugenzura uduce 21 turimo Nturo, Nyamitaba, Rusinga, Petit Masisi, Kilolirwe, Busumba, Kirumbu, Rugogwe, Kibarizo, Cafetaria, Kisangani, Kilumbo, Kalengera, Gatunda, Rugaragara, Kwa Gahimanyi, Rukumbo, Mihanga, Bisembe, Rujebeshe, Brazza, na Kitshanga.
Izi nyeshyamba zirakomeza zivuga ko ubu ziri kugenzura 90% bya Kizimba, kandi ko hagati aho, imirwano ikaze yatangiye saa 6:00 z’igitondo kuri uyu wa Gatanu, itariki 06 Ukwakira 2023 ikomeje kubera ahitwa Rushovu na Rushege muri Gurupoma za Tongo.
