Major Ernest Gashirahamwe, umusirikare w’u Burundi woherejwe guhangana n’abarwanyi b’umutwe witwaje intwaro wa M23 muri teritwari ya Masisi, Repubulika ya demukarasi ya Congo aherutse kwicirwa mu gace ka Kitshanga.
Inkuru y’urupfu rw’uyu ofisiye yamenyekanye tariki ya 5 Ugushyingo 2023, ukaba ari na wo M23 yamwiciyeho. Icyo gihe hishwe n’abandi basirikare benshi b’Abarundi, hafatwa abandi barimo uwitwa Melance Ndikumana.
Amakuru aturuka mu masoko atandukanye aravuga ko indege yamaze gucyura i Bujumbura umurambo wa Major Gashirahamwe n’abandi 14 biciwe muri Kitshanga. Biteganyijwe ko uyu ofisiye azashyingurwa mu cyubahiro tariki ya 16 Ugushyingo 2023.
Pacifique Nininahazwe uyobora umuryango FOCODE utabariza ababuriwe irengero aravuga ko yahawe amakuru n’abasisirikare, bamubwira ko tariki ya 5 Ugushyingo Maj. Gashirahamwe yahawe ibwiriza ryo kujya kurwanya M23, yifatanyije n’imitwe ya Wazalendo.
Uyu ofisiye ngo yajyanye abasirikare, bamwe mu bagize Wazalendo basigara barinda ibirindiro byabo, abandi ba Wazalendo bajyana na bo ku rugamba, barasana bikomeye n’aba M23 ubwo bageraga muri Kitshanga.
Ubwo urugamba rwari rukomeye, aba basirikare bavuze ko Wazalendo bahunze, Abarundi bisanga basigaye bonyine. Maj. Gashirahamwe yahise atanga ibwiriza ry’uko basubira ku birindiro byabo, nyuma yo kubona ko ibintu byahinduye isura.
Mu gihe Maj. Gashirahamwe n’ingabo ze basubiraga inyuma, aya makuru akomeza avuga ko bari bamaze kugotwa n’abarwanyi ba M23 bari bihinduranyije ku buryo byari bigoye kubatandukanya na Wazalendo.
Muri uwo mwanya abarwanyi ba M23 barashe abasirikare b’Abarundi benshi, badasize Maj. Gashirahamwe. Bamwe barapfuye, abandi barafatwa, gusa hari n’ababashije gucika. Wazalendo yo yari yatorotse kare.
Nyuma y’urupfu rw’aba basirikare, ingabo z’u Burundi zavuye mu birindiro byazo muri Kitshanga na Kilolirwe, zijya mu gace ka Lushebere kagenzurwa n’umutwe wa FDLR ufasha Leta ya RDC kurwanya M23.
Biravugwa ko u Burundi buherutse kohereza abasirikare 600 mu ntara ya Kivu y’Amajyaruguru, nyuma yo kwihanangiriza M23 kuko ngo “yatangiriye imodoka zari zigemuye ibiribwa”. Byitezwe ko hashobora kubura imirwano ikaze hagati y’impande zombi.
