Nyuma y’uko ingabo z’u Burundi, Wazalendo, FDLR na FARDC zitinze mu mirwano yo kugerageza gufata Minembwe, zikaza gusubira inyuma zerekeza i Baraka, ubwoba bukomeje kwiyongera mu baturage bo muri ako gace.
Imboni ya Bwiza yatangaje ko abaturage batuye muri secteur ya Tanganyika, igizwe na Makobola na Rusenda kwa Mbogo, bari guhunga berekeza muri Tanzania bakoresheje ubwato. Abatabashije kubona ubwato bo bakoresha inzira z’amaguru banyuze muri Fizi, Force Bendera na Kalemie.
Andi makuru iki kinyamakuru cyamenye ni uko bamwe mu bayobozi ba Wazalendo, ku munsi w’ejo, bohereje ubwato bwari butwaye imiryango isaga 54.
Ibi bibaye nyuma y’uko hari amakuru avuga ko abarwanyi ba M23/Twirwaneho baba begereje agace ka Balaka, banyuze mu bice bya Kabembwe.
Ese ingabo z’u Burundi zizasubira kubohoza Minembwe?
Ibibazo bivugwa mu ngabo z’u Burundi bikomeje kwiyongera. Hari amakuru avuga ko bamwe mu basirikare bakomeje gutoroka berekeza i Kalemie no muri Tanzania, mu gihe abandi baba bahungana n’abaturage.
Col. Elie Ndizigiye, uyoboye ingabo ku rugamba, ngo yatanze itegeko ryo kwambura abasirikare bose telefoni, kubera amakenga ko amakuru ajyanye n’itsindwa ry’ingabo yaba yaragejejwe kuri M23 n’abasirikare bari ku rugamba.
Nyuma y’uko ingabo zidasanzwe zitsindiwe ahitwa Point Zero, ngo zerekeje i Baraka. Col. Nihorimbe, uyoboye iyi diviziyo, yategetse ko abasirikare baguma ku rugamba ndetse bakongera kugerageza gufata Minembwe, avuga ko amafaranga RDC yishyuye u Burundi adakwiye gutuma bata urugamba.
Batayo ya 29 yari imaze igihe irwanira muri Minembwe, aho bivugwa ko yarasiwemo abasirikare barenga 100 mu gihe yari ihamaze. Nyuma yaje gusimburwa na Batayo ya 77 na TAFOC, zari zaturutse i Kalemie. Bakigerayo, na bo bivugwa ko drone yabateye, igahitana abasirikare bagera kuri 40. Kugeza ubu, ngo hageze Batayo ya 11.
Ku wa 26 Nyakanga 2026, ubwato bwavuye i Kalemie butwaye ibikoresho by’ingabo, bivugwa ko byari byaratanzwe n’u Bubiligi na Afurika y’Epfo, bwashwe na drone itazwi ahitwa Kavumbwe muri Tanganyika.
Tubibutse ko agace ka Hauts Plateaux kagizwe na Rurambo, Gashama, ku Itara, Bibangwa, Gafuho, Gitoga, Bijombo, Mucyohagati, Gatanga, Mugeti, Kamombo, Mikarati, Mikenke na Minembwe.
