Guverinoma y’u Rwanda yamaganye amagambo rutwitsi yavuzwe na Perezida Ndayishimiye

Guverinoma y’u Rwanda ibabajwe n’amagambo rutwitsi kandi arwanya Afurika yavuzwe na Perezida w’u Burundi, Evariste Ndayishimiye mu birori byabereye i Kinshasa ku itariki ya 21 Mutarama 2024.

“Perezida Ndayishimiye, yigize impirimbanyi ya Afurika Yunze Ubumwe kubw’Urubyiruko, Amahoro n’umutekano, , yashinje ibirego byinshi bidafite ishingiro kandi rutwitsi bigamije gukurura amacakubiri hagati y’abanyarwanda, no kurushaho guhungabanya amahoro n’umutekano mu Karere k’Ibiyaga Bigari,” iyi ni Guverinoma y’u Rwanda mu itangazo yashyize ahagaragara kuri uyu wa Mbere.

Yavuze ko “Abanyarwanda bakoze cyane kugira ngo bashimangire ubumwe no guteza imbere igihugu. Urubyiruko rw’abanyarwanda rwakiriye aya mahirwe, rufata ibyemezo kandi rugira uruhare runini mu kwiyubakira ejo hazaza heza”.

“Kugirango umuntu wese agerageze no gutesha agaciro iri terambere ahamagarira urbyiruko rw’Abanyarwanda guhirika leta yabo birababaje. Ariko ku muyobozi w’igihugu cy’abaturanyi kubikora, ahereye ku rubuga rw’Umuryango wa Afurika Yunze Ubumwe, ni ukutamenya inshingano ze kandi ni ukurenga ku buryo bugaragara Amasezerano y’Umuryango wa Afurika Yunze Ubumwe”.

Guverinoma yakomee igira iti “U Rwanda ntirushishikajwe no kurema amakimbirane n’abaturanyi bacu. Tuzakomeza gukorana n’abafatanyabikorwa mu karere ndetse no hanze yarwo kugira ngo dushimangire umutekano kandi dukomeze iterambere.