Sudan: Abagera kuri 28 bishwe mu gihe intambara ikomeje guca ibintu i Al Fasher

Guverineri w’agateganyo wa Darfur y’Amajyaruguru yashinje ingabo za (RSF) ko kuri uyu wa Gatandatu, zishe abasivili 28 abandi hafi 45 barakomereka mu gitero cyagabwe mu mujyi wa El Fasher.

Ni nyuma y’imirwano yabereye El Fasher ikaze hagati y’ingabo za Sudani,n’umutwe witwaje intwaro wa RSF inakomeza ku munsi ukurikiyeho, aho abakomando biraye muri uyu mujyi bakica abaturage benshi.

Abaharanira inyungu z’uburenganzira bwa muntu, bashinje RSF kuba yarishe abasivili ibasanze mu ngo zabo bagendeye ku moko,gusa Guverineri Al-Hafiz Bakhit, yavuze ko ingabo zahagaritse icyo gitero zibigizayo.

Bakhit yagize ati: “Ingabo zacu zishobora kurinda igihugu. Igihe kizagera El Fasher yigobotora inyeshyamba izi nyeshyamba.”

Minisiteri y’ubuzima mu majyaruguru ya Darfur, yavuze RSF yarashe ibitaro, ihitana umuntu umwe abandi benshi barakomereka.

Uko iminsi yicuma niko imirwano hagati y’Ingabo za Leta ya Sudan n’umutwe wa ‘RSF’ irushaho guhitana no gukura mu byabo ibihumbi by’abaturage, muri Al Fasher, muri Darfur y’Amajyaruguru, impande zombi ziri gukoresha indege z’intambara n’intwaro ziremereye.