Umuhanzi w’icyamamare ku rwego mpuzamahanga, John Legend yatewe imijugujugu ku mbuga nkoranyambaga nyuma y’uko yagaragaye kuri Sitade ya Arsenal ejo hashize ari kumwe n’umugore we Chrissy Teigen n’abana babo, mu mukino wahuje Arsenal na Ipswich Town.
Muri uyu mukino Arsenal yatsinze 1-0, ikomeza ku mwanya wa kabiri muri Premier League.
Nyuma y’uyu mukino, John Legend yagiranye ikiganiro n’igitangazamakuru Amazon Prime Video ni uko maze umunyamakuru Alex Aljoe wari wamwakiriye mu kiganiro amusaba kuririmba indirimbo yifashishwa mbere y’imikino ya Arsenal izwi ku izina rya North London Forever cyangwa The Angel.
John Legend watsindiye ibihembo bya Grammy inshuro 12, yagerageje kuririmba agace gato k’iyo ndirimbo abifashijwemo n’umunyamakuru wamuhaga amagambo ijambo ku rindi ry’iyo ndirimbo.
Nyuma yo kugaragara ko atazi iyo ndirimbo ndetse bakanamuha amagamba yayo akayaririmba mu buryo butashimishije abakunzi bayo, bifashishije imbuga nkoranyamba abafana bagiye batandukanye bamuteye imijugujugu bamagana uburyo yaririmbyemo iyo ndirimbo.
Umwe yanditse ku mbuga nkoranyambaga ati: “Ikimwaro gikabije.”
Undi yongeyeho ati: “Iki kiganiro giteye isoni.”
Undi mufana yagize ati: “Buri gice cy’umubiri wanjye kirimo kumva ikimwaro.”
Hari n’undi wiyongereyeho agira ati: “Iki ni ikintu giteye ikimwaro cyane.”
Mu gihe abafana benshi bavugaga ko iki kiganiro giteye ikimwaro, impamvu nyamukuru ni uko John Legend ubwe yemeye ko atazi amagambo y’indirimbo yaririmbaga.
Legend wagaragaye bwa mbere kuri Emirates Stadium kuva aho iyi ndirimbo North London Forever yatangira kwifashishwa mbere y’imikino ya Arsenal, yabwiye umunyamakuru Alex Aljoe ko yari akigerageza kumva ibyo abafana baririmbaga.
Yagize ati: “Nari ndimo kumva no kugerageza kumenya ibyo buri wese aririmba. Ariko nkunda uburyo bose bahurije hamwe neza – biratangaje.”
