Abahanzi Niyigena Jean Pierre uzwi ku izina ry’ubuhanzi rya Pedro Someone, afatanyije n’abandi bahanzi barimo P Fla, bagiye gutaramira abatuye mu Mujyi wa Nyamata.
Ni igitaramo kizaba ku wa Kabiri tariki ya 25 Ukuboza 2018, bishimana n’abafana babo kuri uwo munsi Mukuru wa Noheli.
Mu kiganiro yagiranye na Bwiza.com, Pedro yatangaje ko yiteguye gukirigita imirya ya gitari, acurangira abakunzi be Live, bakanibonera impinduka nziza z’umuraperi P Fla muri iyi minsi.
Ati “Mbateganyirije kubacurangira Live, ikindi ni ukwereka abafana ukuntu P- Fla yageze heza dore ko twakoranye n’indirimbo yitwa Impungenge”.
Akomeza avuga ko nubwo bazaba bidagadura, muri iki gitaramo azatangiramo n’ubutumwa bukangurira urubyiruko kwirinda indwara zandurira mu mibonano mpuzabitsina n’ibiyobyabwenge.
Ati “Mbere na mbere intego yacu ni ukunezeza abakunzi bacu, nzabacurangira indirimbo zanjye zikunzwe cyane muri iyi minsi mikuru nka Umwaka Urarangiye, Happy New Year,… no gutangamo Message yo kwirinda indwara zandurira mu mibonano mpuzabitsina no kurwanya ibiyobyabwenge “.
Arakomeza asaba abafana gukomeza kumushyigikira by’umwihariko anabararikira kwitabira iki gitaramo dore ko ibiciro byo kukinjiramo bidahanitse.
Ni igitarami kizabera muri Salle ‘Umurwa w’Amahoro’, ahahoze hitwa muri Facebook, iruhande rw’isoko rya Nyamata, mu karere ka Bugesera.
Iki gitaramo kizatangira saa Cyenda (15:00) kikazarangira saa tatu z’ijoro (21:00). Kwinjira ni amafaranga Magana atanu (500Frs) ku banyeshuri bafite amakarita y’ishuri n’igihumbi (1000Frs) ku basigaye bose.
