Abantu barenga 450 baguye mu myivumbagatanyo yadutse mu Burundi kuva mu mwaka ushize nk’uko byemezwa n’igipolisi muri raporo yacyo kuri ibi bibazo byateye abatari bacye impungenge z’uko muri iki gihugu hashobora kongera kuvuka intambara ishingiye ku moko hagati y’abaturage.
Iyi nkuru dukesha Reuters ivuga ko raporo polisi ifite igaragaza ko abantu 451 bishwe kuva ibibazo byatangira, barimo abapolisi 77 n’abaturage 374 nk’uko polisi ivuga.
Ibi bibazo byatangiye muri Mata 2015 nyuma y’uko perezida Nkurunziza atangarije ko aziyamamariza indi manda ya 3. Nubwo yanenzwe ashinjwa guhonyora itegeko nshinga n’amasezerano y’amahoro ya Arusha yarangije intambara mu 2005, ntibyamubujije kwiyamamaza no gutsinda amatora yabaye muri Nyakanga 2015.
Raporo ya polisi ivuga kop abapolisi 59 bafunzwe mu mwaka ushize kubera imyitwarire mibi, nubwo hatavugwa iyo myitwarire iyo ari yo birambuye, gusa abatavuga rumwe n’ubutegetsi bakomeje gushinja igipolisi gukoresha ubugizi bwa nabi mu kurwanya abigaragambyaga bamagana iyi manda.
Guverinoma ihakana ibi, ikavuga ko abapolisi babaga bakurikiye abigaragambya bafashe intwaro. Byibuze imitwe 3 y’inyeshyamba yaravutse, umwe muri yo ukaba ngo uyobowe n’abasirikare bananiwe guhirika ku butegetsi perezida Nkurunziza muri Gicurasi 2015.
Kanda hano ujye ubona amakuru yihuse kandi kugihe kuri Facebook no kuri twitter
@bwiza.com
