Ingabo za Repubulika ya Demukarasi ya Congo (RDC) ziciye abarwanyi 22 b’umutwe witwaje intwaro muri Teritwari ya Beni mu Ntara ya Kivu y’Amajyaruguru, zita muri yombi n’abandi bantu 60 bakorana nawo, kuva ibihe bidasanzwe byatangira.
Nk’uko tubikesha Radio Okapi, byatangajwe n’Umuvugizi wa Operation Sokola 1 ikorera muri Kivu y’Amajyaruguru, Lt. Anthony Mwalushay.
Lt. Mwalushay yagize ati: “Abarwanyi 22 ba ADF bishwe, intwaro 8 zirafatwa, abagera kuri 60 bakorana n’aba barwanyi, bafatirwa muri Teritwari ya Beni.”
Uyu musirikare yasobanuye ko aba bantu 60 batawe muri yombi, bafasha ADF mu bitero igaba ku basivili muri iyi teritwari.
Ibihe bidasanzwe muri RDC byatangiye tariki ya 6 Gicurasi 2021, bikaba bitengayijwe ko bizamara iminsi 30.
Muri iki gihe, ingabo za RDC zakajije ibitero ku mitwe yitwaje intwaro ikorera mu Ntara ya Kivu y’Amajyaruguru na Ituri, zombi ziri mu burasirazuba bw’igihugu.
Kurikira ibiganiro n’amavidewo binyura kuri Bwiza TV
