Abarwanyi 220 b’umutwe witwaje intwaro wa Mai Mai Biloze Bishambuke uvugwaho kubuza amahwemo abo mu bwoko bw’Abanyamulenge muri Teritwari ya Fizi mu Ntara ya Kivu y’Amajyepfo, muri Repubulika ya Demukarasi ya Congo (RDC), bemeye kurambika intwaro.
Ni icyemezo aba barwanyi bafashe nyuma y’uruzinduko abasirikare bakuru ba RDC bari bahagarariwe na Col. Alexis Rugabisha na Col. Mukelenge Album bagiriye muri Fizi kugeza tariki ya 16 Gicurasi 2021, rwari rugamije kugarura amahoro.
Nk’uko Radio Okapi yabitangaje, aba basirikare baganiriye n’abahagarariye abarwanyi ba Mai Mai mu gace ka Lulenge muri iyi teritwari, ari bwo aba Biloze Bishambuke bemeye kurambika intwaro.
Aba basirikare biteganyijwe ko bazakomeza kugirana ibiganiro n’abandi barwanyi bakorera muri iyi teritwari, nko muri: Rugezi, Mutambala na Itombwe.
Mai Mai Biloze Bishambuke ni umwe mu mitwe yitwaje intwaro Abanyamulenge batuye muri Fizi bavuga ko ubagabaho igitero kigamije kubatsembaho. Indi irimo: Mai Mai Ilungu, Yakutumba, Mulumba, Ebuila Mtetezi, Aoci, hamwe na: Red-Tabara, FOREBU na FNL ikomoka mu Burundi.
Icyakoze, nka Mai Mai Lungu yo yigeze guhakana uruhare rwayo ku bitero byibasira abasivili, ivuga ko irwanya umutwe witwaje intwaro w’abarwanyi nka Col. Michel Rukunda (Makanika), umwe mu Banyamulenge bahoze ari abasirikare bakomeye mu ngabo za RDC.
Kurikira ibiganiro n’amavidewo binyura kuri Bwiza TV
