Leta ya Repubulika ya Demukarasi ya Congo (RDC) yatangiye gufungura abarwanyi b’umutwe witwaje intwaro wa CODECO, kugira ngo intumwa esheshatu (6) za Perezida Félix Tshisekedi zafashwe bugwate na zo zirekurwe.
Ku ikubitiro, kuri uyu wa 10 Werurwe 2022 harekuwe abarwanyi 29 bari bafungiwe muri gereza nkuru ya Bunia iherereye mu ntara ya Ituri, iki gikorwa kikaba cyitabiriwe n’umuyobozi w’ubwoko bw’Abalendu bwiganje muri CODECO.
Bivugwa ko kandi iyi gereza izakomeza gufungura n’abandi barwanyi, gusa ikitaramenyekana ni niba bose uko ari 400 bazafungurwa.
Tariki ya 16 Gashyantare 2022 ni bwo Perezida Tshisekedi yoherereje CODECO izi ntumwa zihuriye mu itsinda ryiswe Task Force, kugira ngo impande zombi ziganire ku buryo bwo kurambika intwaro, abarwanyi babyifuza bagasubizwa mu buzima busanzwe.
Gusa CODECO yaje gutungurana, itangaza ko yafashe bugwate izi ntumwa, bitewe n’uko mu gihe ibiganiro byari birimbanyije, abasirikare ba Leta barenze ku isezerano, barasa ku birindiro byayo.
Uyu mutwe mu itangazo wasohoye, wahise ushyiraho amabwiriza Leta ya RDC igomba kubahiriza kugira ngo izi ntumwa zirekurwe. Aya arimo: gufungura abarwanyi bayo, gukura Kivu y’Amajyaruguru na Ituri mu bihe bidasanzwe imazemo igihe no gukuraho ba Guverineri bazo b’abasirikare.
Izi ntumwa zafashe bugwate zirimo abahoze bafite imitwe yitwaje intwaro yarwanyaga ubutegetsi: Thomas Lubanga, Floribert Ndjabu na Germain Katanga.
Inkuru y’ifatwa bugwate ryabo n’ibyo CODECO yifuza https://bwiza.com/?RDC-CODECO-yagize-ibyo-isaba-kugirango-irekure-Thomas-Lubanga-na-bagenzi-be
