Kuri uyu wa Mbere, Turkiya yavuze ko abasirikare barenga icumi bapfuye bazize ubumara bwa gaz methane nyuma yo guhura nabwo ubwo bari bari gusaka ubuvumo buri mu majyaruguru ya Irak bashakisha umurambo w’umusirikare warashwe n’abarwanyi b’Aba-Kurde mu myaka itatu ishize.
Minisiteri y’Ingabo yatanze umubare w’abantu umunani bapfuye bwa mbere, ariko nyuma irawuzamura nk’uko iyi nkuru dukesha Deutsche Welle ivuga.
Minisiteri yagize iti: “Abandi bane muri bagenzi bacu b’intwari mu gisirikare, bahuye na gaz methane, barapfuye … bituma umubare w’abapfuye ugera kuri 12.”
Methane ni gaz itagira ibara, idafite impumuro, yaka umuriro ishobora gutera kunanirwa guhumeka ahantu ari nyinshi.
Turkiya yavuze iki?
Ku Cyumweru, minisiteri yagize iti: “Mu gikorwa cyo gusaka mu buvumo … buzwi ko bwakoreshejwe mbere nk’ibitaro … 19 mu bakozi bacu bahuye na gaz methane”.
Ivuga ko abandi basirikare nabo bahuye na gaz mu buvumo bajyanywe mu bitaro kugira ngo bavurwe.
Minisiteri yavuze ko ibyabereye mu gace kazwi nka “Claw-Lock Operation region”, aho baba bavuga kuri operation ya gisirikare ku mutwe wa PKK cyangwa Kurdistan Workers Party, mu majyaruguru ya Irak muri Mata 2022 hagamijwe kwirukana abarwanyi bari mu buvumo ku mupaka.
Iyi minisiteri yemeza ko uyu musirikare , bashakishaga umurambo we, yiciwe mu gitero cy’iterabwoba. Amakipe yo gushakisha ibisigazwa bye amaze imyaka itatu ashakisha muri ako gace.
