Bitewe n’ibibazo by’umutekano muke biri kwiyongera mu mujyi wa Lubumbashi mu Ntara ya Haut-Katanga muri Repubulika ya Demukarasi ya Congo, abofisiye 80 b’igisirikare cy’igihugu batari mu kazi, bategetswe kuhava bakajya mu murwa mukuru, Kinshasa.
Ni itegeko ryatanzwe na zone ya kabiri y’igisirikare cya RDC ishinzwe umutekano w’ibice birimo umujyi wa Lubumbashi, tariki ya 23 Werurwe 2021.
Mu itangazo ryasohowe na komanda wungirije w’iyi zone nk’uko tubikesha Actualité, hari urutonde rw’aba bofisiye, hanyuma rikagira riti: “Aba basirikare amazina yabo ari ku rutonde bategetswe kuva Lubumbashi, bakajya Kinshasa.”
Iki cyemezo gifashwa nyuma y’aho mu kwezi gushize, umujyi wa Lubumbashi wagabwemo ibitero n’abarwanyi b’umutwe wa Bakata Katanga, washinze ibirindiro muri iyi Ntara. Icyo gitero cyaguyemo abagera kuri 16 abasirikare b’igihugu 4, abasivili n’abarwanyi ubwabo. Byinshi kuri iyi nkuru https://bwiza.com/?RDC-Abakomando-1800-boherejwe-i-Lubumbashi
Nyuma y’iki gitero, i Lubumbashi hoherejwe abakomando baturutse muri Kinshasa bari mu mutwe udasanzwe urinda abayobozi bakomeye.
Mu minsi mike ishize, Lubumbashi iherutse koherezwamo itsinda ry’abasirikare bakuru 10 bagenzwaga no kugenzura uko umutekano waho uteye.
Kurikira ibiganiro n’amavidewo binyura kuri Bwiza TV
