Umutwe wa AFC/M23 na Komite Mpuzamahanga ya Croix-Rouge, mu mpera z’icyumweru gishize basinyanye amasezerano yerekeye gutwara abasirikare bo mu ngabo za Repubulika Iharanira Demokarasi ya Congo (FARDC) bari mu maboko y’uriya mutwe.
Ni amasezerano yashyizweho umukono hagati y’itariki ya 11 n’iya 12 Mata, akaba ateganya ko abasirikare ba Leta ya Kinshasa bari mu maboko ya AFC/M23 bagomba kubanza gushyirwa mu maboko ya CICR, mbere yo gushyikirizwa Guverinoma ya Congo.
Radiyo Mpuzamahanga y’Abafaransa (RFI), ivuga ko abasirikare bari hagati ya 2,000 na 3,000 ari bo barebwa n’ariya masezerano.
Amakuru avuga ko bamwe muri bariya basirikare biganjemo abana batarageza ku myaka y’ubukure bamaze gushyikirizwa CICR, kugira ngo izabahe Kinshasa.
Amakuru kandi avuga ko hakiri imbogamizi ku bandi basirikare basigaye, bijyanye no kuba hari ikibazo cy’ibikoresho byakwifashishwa mu kubakira, ikindi leta ya Congo Kinshasa ikaba itaremera kubafata.
Amasoko yo muri Leta ya RDC yavuganye na RFI avuga ko mbere y’uko Kinshasa yakira bariya bantu, igomba kubanza yagenzura imyirondoro yabo; ibyo leta yaneruriye AFC/M23 mu biganiro biri guhuriza impande zombi mu mujyi wa Montreux mu Busuwisi.
