Ihuriro rya AFC / M23 ryamenyesheje umuhuza mu biganiro by’amahoro bya Doha, ndetse n’abafatanyabikorwa mpuzamahanga bose, ko mu gihe intumwa zaryo zerekeje mu Busuwisi kugira ngo zigire uruhare mu biganiro bishya, mu rwego rwo kubahiriza inshingano no kwiyemeza gukemura ibibazo mu mahoro, ubutegetsi bwa Kinshasa, bushyize imbere intambara no kuyikomeza, bwategetse ihuriro ry’ingabo zabwo kugaba ibitero ku bice bituwe cyane.
Mu itangazo ryayo, AFC/M23 yatangaje ko kuva ku wa Gatatu, itariki 8 Mata, no ku wa Kane, itariki ya 9 Mata 2026, ibice bya Nyabyondo, Gahira, hamwe n’ibice bihakikije muri Teritwari ya Masisi byibasiwe n’ibitero bya bombe inshuro nyinshi, haba ku butaka ndetse no mu kirere, hakoreshejwe imbunda nini ndetse n’indege zitagira abapilote.
Uyu mutwe urwanya ubutegetsi kuri uyu wa Kane wavugaga ko ibitero byari bikomeje, byateye ubwoba abaturage, wamagana ukomeje icyo wise politiki y’urukozasoni yo guhungabanya inzira y’amahoro, irangwa no kugaragaza gushyigikira ibiganiro imbere y’amahanga mu gihe hategurwa ibitero simusiga ku baturage b’inzirakarengane.
AFC/M23 ivuga ko ikomeje gushyigikira igisubizo cya politiki mu gukemura amakimbirane, mu gihe ishimangira ko yiyemeje kurengera no kurinda abaturage n’ibyabo.
Ibi biganiro, ubusanzwe bitegurwa na Qatar kuri iyi nshuro bigiye kubera mu Busuwisi kubera ikibazo cy’intambara iri mu Burasirazuba bwo Hagati, bizatangira mu cyumweru gitaha ku wa Mbere, itariki 13 Mata kugeza ku wa Gatanu.
