Leta ya Tanzania iratangaza ko Leta ya Afurika y’Epfo yafashe indege ya Air Tanzania ku busabe bw’Urukiko Rukuru, aho uwahoze ari umuhinzi wagiye mu zabukuru avuga ko iyo ndege yafashwe kubera ko Tanzania yananiwe kumwishyura indishyi y’asaga miliyoni 30 z’amadolari yagombaga kumwishyura.
Indege yafashwe ni Airbus 220-300 yagombaga guhaguruka i Johannesburg muri Afurika y’Epfo kuri uyu wa Gatanu ushize yerekeza I Dar es Salaam muri Tanzania.
Gusa, ntabwo hahise hamenyekana impamvu indege yafatiriwe kubera ko abayobozi ba Afurika y’Epfo birinze kugira ibisobanuro batanga.
Ambasaderi wa Tanzania muri Afurika y’Epfo we ariko yatangaje ko iyo ndege yafashwe bisabwe n’Urukiko Rukuru mu Mujyi wa Johannesburg. Ibi bikaba byabaye nyuma y’amezi abiri Air Tanzania itangiye ingendo muri Afurika y’Epfo.
Hagati aho ariko nk’uko bitangazwa na BBC, ngo hari uwahoze ari umuhinzi wagiye mu zabukuru uvuga ko indege yafatiriwe kubera ko Leta ya Tanzania yananiwe kumwishyura indishyi zingana na miliyoni 33 z’amadolari yagombaga kumwishyura.
Uwunganira uyu mu mategeko, Roger Wakefield, yatangaje ko ayo mafaranga yagombaga kuyishyurwa nyuma y’aho Leta ya Tanzania ifatiye imirima y’uyu muhinzi ukomoka mur Afurika y’Epfo.
Umuvugizi wa Leta ya Tanzania akaba avuga ko abunganira leta mu mategeko bamaze kugera muri Afurika y’Epfo mu rwego rw’iperereza.
Si ubwa mbere indege ya Air Tanzania ifatiriwe kuko mu 2017, ishyirahamwe ry’ubwubatsi ryo muri Canada, Stirling Civil Engineering, naryo ryatumye indege nshya ya Bombardier Q400 ya Air Tanzania ifatirwa mu rubanza rwa miliyoni 38 z’amadolari.
Iyi ndege yaje kurekurwa muri Werurwe 2018 nyuma y’aho Minisitiri w’Intebe wa Tanzania n’Umucamanza Mukuru bagiranye ibiganiro n’iryo shyirahamwe. Nta bisobanuro by’ibyo baganiriye kugirango indege irekurwe byatanzwe.
