Imibiri y’abasirikare babiri bo muri Afurika y’Epfo biciwe muri Repubulika Iharanira Demokarasi ya Kongo (DRC) basubijwe mu gihugu cyabo kuri uyu wa Gatanu taliki 16 Gashyantare 2024, naho abakomeretse ngo bakomeje kwitabwaho.
Ku ya 14 Gashyantare 2024 ,nibwo igisasu cyaguye muri kimwe mu birindiro by’ingabo bya Afurika y’Epfo bikomeretsa abasirikare batatu ba SANDF abandi babiri barapfa.
Ku munsi ukurikiyeho SADC yohereje ubutumwa bwihanganisha imiryango yaba basirikare igira iti”SADC irashaka kwihanganisha byimazeyo imiryango y’abasirikare 2 bo muri Afurika y’Epfo bishwe ndetse n’abandi batatu bakomeretse i Goma nyuma y’igisasu cyahaturikiye.
Ingabo z’Afurika y’Epfo ziri mu butumwa bwa SADC muri DRC (SAMIRC) zoherejwe mu gushyigikira no gufasha guverinoma ya DRC mu bikorwa byayo byo kuzana amahoro, umutekano muri ako karere.Gusa minisitiri w’ingabo wa DR Congo aherutse gutangaza ko zazanywe no kurasa umutwe wa M23 ubarizwa mu burasirazuba bwa Congo.
