Nibura abantu 10 bapfuye abandi benshi barakomereka ubwo abaterabwoba ba al-Shabaab bateraga inyubako yo guturamo mu murwa mukuru wa Somaliya, Mogadishu, bakamisha amasasu nta kuvangura ku basivili, maze umwe muri bo yiturikirizaho igisasu .
Nk’uko ibitangazamakuru byaho bibitangaza, ngo ku mugoroba wo kuri uyu wa Kabiri, abaterabwoba batanu bo mu mutwe wa al-Shabaab, ufitanye isano n’umutwe w’iterabwoba wa al-Qaeda, bagabye igitero ku nyubako ituwemo, aho n’umusirikare mukuru wa Somaliya na we atuye.
Minisiteri y’itangazamakuru mu itangazo ryayo yavuze ko icyo gitero cyatangiranye no kwiyahura, hakurikiraho amasasu yahitanye abantu 10 nk’uko iyi nkuru dukeha Anadolu Agency ivuga.
Minisiteri yavuze ko abashinzwe umutekano barangije icyo gikorwa kandi bica abantu bane mu baterabwoba bagabye igitero.
Yongeyeho ko abashinzwe umutekano bane bakomeretse muri iki gikorwa cyarangije kwigarurira iyo nyubako kwa al-Shabaab.
Ibitangazamakuru byaho byavuze ko bamwe mu barwanyi bakomeretse bo mu mutwe witwaje intwaro ufatanya na leta witwa Macwisley bari bacumbitse muri iyi nyubako igihe abarwanyi ba al-Shabaab bayiteraga.
Macwisley ni umutwe witwara gisirikare ushingiye ku bwoko urwanya al-Shabaab mu ntara zo hagati mu gihugu.
Nyuma Al-Shabaab yigambye icyo gitero mu itangazo ryashyizwe ku rubuga rwa interineti, ivuga ko yagabye igitero ku birindiro bya Macwisley kandi ihitana abantu barenga 70.
Hagati aho, guverinoma ya Somaliya yatangaje ku wa Kabiri ko ingabo zishyigikiwe n’abafatanyabikorwa mpuzamahanga, zagabye igitero cy’amasaha 30 cyo kurwanya iterabwoba mu karere ka Shabelle rwagati, zica abarwanyi 42 ba al-Shabaab.
