Abarwayi b’umutwe witwaje intwaro wa FLN urwanya Leta, mu ijoro ryo kuri uyu wa 23 Gicurasi 2021 binjiye mu Karere ka Rusizi mu Rwanda baturutse mu Burundi, ingabo za RDF zicamo babiri, zifata n’intwaro zimwe bari bafite.
Nk’uko byatangajwe na RDF ku rubuga rwayo, aba barwanyi binjiriye mu mu mudugudu wa Rwamisave, Akagari ka Nyamuzi, mu Murenge wa Bweyeye baturutse muri gace ka Giturashamba kari muri Komini Mabayi mu Burundi, mu masaa tatu.
RDF yatangaje iti: “Mu ijoro ryakeye ryo ku Cyumweru tariki ya 23 Gicurasi 2021 hagati ya saa tatu n’iminota 15 na saa tatu n’iminota 35, abanzi b’umutwe wa FLN bagera muri segisiyo, baturutse muri Giturashyamba muri Komini Mabayi mu Burundi, bambutse umugezi wa Ruhwa ku mupaka wacu, binjira mu Rwanda muri metero zigera mu 100 muri Bweyeye, Akagari ka Nyamuzi, Umudugudu wa Rwamisave.”
Segisiyo ni itsinda ry’abasirikare bari hagati ya 11 na 13, akenshi baba bayobowe n’ufite ipeti rya Sergeant (SGT).
Intwaro z’aba barwanyi zafashwe. Zirimo: mashini gani ntoya (sub machine gun) imwe, magazine 7, gerenade imwe, icyombo kimwe cya Motorola n’impuzankano z’igisirikare cy’u Burundi ebyiri.
RDF yavuze ko yasubije aba barwanyi inyuma, basubira mu ishyamba rya Kibira mu Burundi, aho basanzwe bafite ibirindiro.
FLN ikunze kugaba ibitero mu Rwanda iturutse mu ishyamba rya Kibira. Ibyahungabanyije cyane umutekano w’abaturage ni ibyo yagabye mu duce twa Nyaruguru na Nyamagabe twegereye Nyungwe mu 2019.
Amafoto: RBA/Twitter
