Ikipe y’Igihugu ‘Amavubi’ iguye miswi na Libya igitego 1-1, mu mukino w’ijonjora ryo gushaka itike y’Igikombe cya Afurika cy’ibihugu cya 2025 kizabera muri Maroc.
Libya yari yakiriye u Rwanda mu mukino wa mbere wo mu itsinda D wabereye kuri Stade yitiriwe itariki ya 11 Kamena i Tripoli.
Ni umukino abasore b’umutoza Frank Spitter bagowe n’igice cya mbere cyawo cyarangiye bari inyuma n’igitego 1-0.
Libya yatsinze iki gitego ku munota wa 16 w’umukino ibifashijwemo na myugariro w’ibumoso Subhi Al Dhawi. Hari ku mupira wari utakajwe na Kevin Muhire mbere y’uko uyu mukinnyi awinjirana mu rubuga rw’amahina, arekura ishoti ryahise riruhukira mu ncundura z’izamu ryari ririnzwe na Ntwali Fiacre.
Amavubi yashoboraga gufungura amazamu ku munota wa gatandatu w’umukino ubwo rutahizamu Nshuti Innocent yazamukanaga umupira wari utakajwe n’abakinnyi ba Libya, awutereye mu rubuga rw’amahina biba ngombwa ko umunyezamu Murad Al Woheshi awukuzamo amaguru.
Amavubi y’u Rwanda yatangiye igice cya kabiri cy’umukino yotsa Libya igitutu, ndetse ku munota wa 47 w’umukino Nshuti Innocent ahita agombora igitego yari yatsinzwe.
Ni ku mupira Kapiteni Bizimana Djihad yahinduriye ku ruhande rw’iburyo, mbere y’uko Nshuti awutereka mu izamu n’igituza.
Uyu musore wa One Knoxville SC yo muri Amerika yashoboraga gutsinda igitego cya kabiri ubwo Niyomugabo Claude yahinduraga umupira bikarangira ucitse umunyezamu wa Libya, gusa Nshuti wari mu rubuga rw’amahina awuteye ntiwafata neza ku kirenge cye.
Igice cya kabiri hafi ya cyose cyaranzwe no gusatirana hagati y’amakipe yombi gusa iminota isanzwe y’umukino irangira amanota atatu bayagabanye.
Amavubi azagaruka mu kibuga ku wa Kabiri w’icyumweru gitaha yakira Super Eagles ya Nigeria, mu mukino uzabera kuri Stade Amahoro.
