Ikipe y’Igihugu ‘Amavubi’ yaguye miswi na Sudani 0-0, uba umukino wa karindwi wikurikiranya kuva afashwe n’umutoza Carlos Alos Ferrer utaratsinda umukino n’umwe kuva ahawe inshingano zo kuyitoza.
Amavubi y’u Rwanda yari yahuriye na Sudani kuri Stade ya Kigali i Nyamirambo, mu mukino wa gicuti amakipe yombi yari yahuriyemo ku mugoroba wo kuri uyu wa Kane.
Igice cya mbere cyawo cyaranzwe no guhererekana cyane ku ruhande rw’Amavibi, gusa ntibagira uburyo bukanganye bw’ibitego bashobora kurema.
Uburyo bwabonetse ku munota wa 17 w’umukino ubwo Niyomugabo Claude yahinduraga umupira imbere y’izamu bikarangira umupira ugarukiye Mugenzi Bienvenu wawuteye ugashyirwa muri koruneri n’umunyezamu Mustafa Muhamed wa Sudani, buri muri buke bwagaragaye muri uyu mukino.
Ubusatirizi bwa Nshuti Dominique Savio, Mugenzi Bienvenu na Hakizimana Muhadjili babanje mu kibuga nta cyugazi bwigeze butera izamu ry’abanya-Sudani.
Igice cya kabiri cy’umukino cyaranzwe n’impinduka nyinshi zasize umutoza Carlos ahaye umwanya abarimo Hakim Sahabo wo muri Lille yo mu Bufaransa wigaragaje cyane; mu gihe abarimo rutahizamu Gerard Gohou, Rafael York, Muhozi Fred, Serumogo Ally, Imanishimwe Emmanuel na Niyigena ClĂ©ment binjiye mu kibuga mu minota ya nyuma y’umukino nta bidasanzwe bigeze bakora.
Umukino wo muri uyu mugoroba wabaye uwa karindwi wikurikiranya Amavubi amaze atazi uko gutsinda bisa, nyuma yo guhabwa Umunya-Espagne Carlos.
Igikomeye iyi kipe yakoze ni ukunganya na Mozambique igitego 1-1 mu mukino wo gushaka itike y’Igikombe cya Afurika, kunganya na Ethiopia 0-0 mu gushaka itike ya CHAN ndetse no kunganya na GuinĂ©e-Equatoriale 0-0 mu mukino wa gicuti.
Amavubi kandi yatsinzwe na SĂ©nĂ©gal igitego 1-0 mu ijonjora ryo gushaka itike y’Igikombe cya Afurika, atsindirwa i Huye na Ethiopia igitego 1-0 mbere yo gutsindwa na St Eloi Lupopo yo muri RDC ibitego 3-1; mu mukino wa gicuti wabereye muri Maroc.
