Minisiteri y’ububanyi n’amahanga yemeje ko Ambasaderi wa Kenya muri Nigeria, Dr Wilfred Machage, yapfiriye i Abuja ku gicamunsi cyo ku wa Gatandatu nyuma y’uburwayi bw’igihe gito.
Minisiteri yemeje ko uyu mudipolomate w’imyaka 65 yituye hasi ari we ahita ajyanwa mu bitaro, aho byatangajwe ko yapfuye akihagera imbere y’umugore we, nk’uko minisiteri yabitangaje mu itangazo.
Umunyamabanga mukuru w’ububanyi n’amahanga, Macharia Kamau, wemeje aya makuru, yavuze ko Kenya yatakaje umuyobozi witangiye igihugu cye.
Dr Machage yanahagarariye igihugu cye muri Cote d’Ivoire, Ghana, Guinea ya Equatorial, Benin, Togo, Niger ndetse n’ibindi bihugu bitandatu byo muri Afurika yo Hagati n’Uburengerazuba.
Dr Machage yashyizwe kuri uyu mwanya na Perezida Uhuru Kenyatta muri Mutarama 2018, mbere akaba yari Senateri watowe mu Ntara ya Migori.
Yinjiye muri politiki mu 2002 ubwo yatsindiraga umwanya w’ubudepite kugira ngo ahagararire icyo gihe Kuria.
Yagumanye umwanya we mu 2007, mbere yo kwiyamamariza umwanya wa Sena, hashingiwe ku Itegeko Nshinga rishya ryashyizeho intara mu 2013.
Muri 2017, yatakaje umwanya, nyuma yaho ava muri politiki mbere yo gutangira imirimo ya ambasaderi umwaka ukurikira.
