Leta Zunze Ubumwe za Amerika zatesheje agaciro visa y’Umushinjacyaha Mukuru w’Urukiko Mpuzamahanga Mpanabyaha, Fatou Bensouda, nyuma y’uko uyu atangije mu buryo butunguranye iperereza ku byaha byakorewe muri Afghanistan n’abasirikare b’Abanyamerika.
Nyuma yo kunengwa n’abatari bacye guhanagura ibyaha ku wahoze ari Perezida wa Cote d’Ivoire, Laurent Gbagbo n’Umunyekongo Jean Pierre Bemba, kuri ubu Urukiko Mpuzamahanga Mpanabyaha rwibasiwe n’ubuyobozi bwa Perezida Donald Trump.
“ Twakwemeza ko abayobozi ba Amerika batesheje agaciro visa yo kwinjira muri Leta Zunze Ubumwe za Amerika y’umushinjacyaha ,” ibi ni ibyatangajwe n’ibiro bya Fatou Bensouda mu itangazo ryashyizwe ahagaragara kuri uyu wa Gatanu, itariki 05 Mata. Uyu ariko ngo azakomeza akazi ke nta bwoba kandi na kubera nk’uko iri tangazo rikomeza rivuga.
Mu 2017 nibwo Umushinjacyaha Mukuru wa CPI, Bensouda, yari yatangaje ko agiye gusaba abacamanza gutanga uruhushya rwo gufungura iperereza ku byaha by’intambara byakozwe n’ingabo za Amerika mu ntambara yo muri Afghanistan nk’uko Jeune Afrique dukesha iyi nkuru ikomeza ivuga.
Mu kwezi gushize, Leta Zunze Ubumwe za Amerika zikaba zaratangaje nazo ko zitazatanga visa mu rwego rwo kugerageza kwitambika iryo perereza ku ngabo zazo. Ni mu gihe Perezida wa CPI, Chile Eboe-Osuji, ku itariki ya 01 Mata, yari yahamagariye Leta Zunze Ubumwe za Amerika gushyigikira urukiko no kubahiriza amasezerano yashinze uru rukiko.
