Jose Filomeno dos Santos, umuhungu w’uwahoze ari Perezida wa Angola, Jose Eduardo dos Santos, wari ukurikiranweho icyaha cyo kugerageza kwiba akayabo ka miliyari 1,5 y’Amadolari ubwo yari akuriye ikigega cy’ubusugire bw’ubukungu bwa Angola, kuri iki Cyumweru yarekuwe nyuma yo kumara amezi arindwi muri gereza.
Jose Filomeno yarekuwe ku gicamunsi cyo kuri iki Cyumweru, itariki 24 Werurwe nk’uko Menezes Cassoma, umuvugizi w’urwego rw’amagereza muri Angola yabitangarije AFP.
Kuwa Gatanu ushize, Jean-Claude Bastos de Morais wafatiwe rimwe na Filomeno, yarekuwe nta cyaha ashinjwe. Uyu ni Perezida wa Quantum Global, ikigo cyari gishinzwe gucunga iki kigega Filomeno yashinjwaga kugerageza kwiba.
Kuri uyu munsi abashinjacyaha bakaba baratangaje ko bagaruje imitungo y’ikigega cya leta cyagenzurwaga na Quantum Global ibarirwa muri miliyari 2,35 z’amadolari ibitse mu mabanki yo mu Bwongereza no muri Mauritius ndetse na miliyari y’amadolari ibitse mu mitungo nk’amahoteli, mu bucukuzi bwa zahabu, mu buhinzi n’ibindi hirya no hino mu gihugu no hanze yacyo.
Jose Filomeno dos Santos yari yagizwe umuyobozi w’iki kigega gifite agaciro ka miliyari 5 z’amadolari mu 2013 ashyizweho na se wari ukiri perezida icyo gihe.
Akigera ku butegetsi muri nzeri 2017, Joao Lourenco yahise amwirukana muri Mutarama 2018.
