Ikipe ya APR FC ku wa Kabiri yasuwe mu myitozo n’abasirikare bakuru mu ngabo z’u Rwanda, bizeza abakinnyi ndetse n’abatoza ko babari inyuma mu mikino ikipe ifite muri iki cyumweru.
Abasuye ikipe barangajwe imbere n’Umugaba Mukuru w’Ingabo zirwanira ku butaka, Maj. Gen Vincent Nyakarundi wari kumwe n’Umugaba Mukuru w’Inkeragutaba Maj.Gen Alex Kagame ndetse na Chairman mushya wa APR FC, Brig. Gen Deo Rusanganwa.
Kuri uyu wa Gatatu iriya kipe y’Ingabo z’igihugu irakina na Police FC bahurira kuri Kigali Pele Stadium, mbere yo kwesurana na Rayon Sports bazahurira kuri Stade Amahoro mu mukino w’ishiraniro uteganyijwe ku wa Gatandatu w’iki Cyumweru.
Iyi kipe y’Ingabo z’igihugu itaremeza abakunzi bayo kuri ubu iri ku mwanya wa gatanu n’amanota 17, n’ubwo igifite imikino itatu y’ibirarane.
Irarushwa amanota icyenda na mukeba wayo Rayon Sports iyoboye urutonde rwa shampiyona by’agateganyo.
