Ikipe ya APR FC yatsinze AS Kigali ibitego 2-0 mu mukino w’igikombe cy’Intwari wabereye kuri Stade ya Kigali i Nyamirambo kuri uyu wa Kabiri.
Igice cya mbere cy’umukino cyaranzwe no kwataka kw’impande zombi ariko nta gitego cyabonetse, amakipe yombi anganya 0-0.
Igice cya kabiri cyatangiye APR FC isatira cyane, maze ku munota wa 55 ihabwa penaliti nyuma y’ikosa ryakorewe Mugisha Gilbert mu rubuga rw’amahina.
Penaliti yatewe neza na Denis Omedi, umukinnyi mushya w’Umunya-Uganda, bituma APR FC ibona igitego cya mbere.
Ku munota wa 80, APR FC yongeye kubona igitego cya kabiri nyuma y’umupira w’umuterekano watewe neza na Niyibizi Ramadhan. Iki gitego cyaturutse ku kosa ryakorewe Dushimirimana Olivier Muzungu.
APR FC yakomeje kugenzura umukino, AS Kigali igorwa no kubona uburyo bwo kwishyura, umukino urangira ari ibitego 2-0.
Iyi ntsinzi yatumye APR FC igera ku mukino wa nyuma w’igikombe cy’Intwari, aho izahura n’izava hagati ya Rayon Sports na Police FC, umukino uteganyijwe kuri uyu wa Kabiri saa kumi n’ebyiri z’umugoroba.
