Abana b’umunyamakuru Jamal Khashoggi wiciwe Instanbul muri Turkiya kuwa 02 Ukwakira 2018, bahawe n’abategetsi ba Arabia Saoudite akomokamo impozamarira y’amazu n’amamiliyoni menshi y’amadolari nk’uko byahishuwe n’ikinyamakuru The Washington Post.
Nk’uko The Washington Post, umunyamakuru Khashoggi yanandikiraga ivuga, ngo inzu abana be bahawe ziherereye Djeddah, ahantu hameze nk’umudugudu kandi buri imwe ifite agaciro ka miliyoni 4 z’Amadolari. Kuri ibi hiyongeraho amafaranga abana ba Khashoggi bane bazajya bahabwa buri kwezi agera ku 10,000 by’Amadolari nk’uko iki kinyamakuru kibikesha bamwe mu begereye ubutegetsi n’abegereye umuryango.
Iki kinyamakuru kandi kivuga ko bashobora no kuzakira andi mafaranga menshi abarirwa mu mamiliyoni y’Amadolari buri muntu mu rwego rw’imishyikirano ku giciro cy’amaraso yamenwe igihe urubanza rw’abakekwaho uruhare mu iyicwa rya Khashoggi ruzaba rurangiye mu mezi ari imbere.
Bikaba bivugwa ko impozamarira ku bana ba Khashoggi yategetswe mu mpera za 2018 n’Umwami Salmane, mu rwego rw’ibyasobanuwe n’uwahoze ari umuyobozi muri Arabia Saoudite nko kwemera akarengane kabaye no kugerageza gukosora kosa ryakozwe. Ibi ngo akaba ari ibisanzwe mu muco wo muri Arabia Saoudite.
Biravugwa ko imishyikirano yagejeje kuri iyi myanzuro yayobowe na Khalid Ben Salmane, umuvandimwe w’Igikomangoma Mohammed Ben Salmane, na Ambasaderi wa Arabia Saoudite muri Leta Zunze Ubumwe za Amerika. Umuhungu w’imfura wa Khashoggi witwa Salah (uri ku ifoto asuhuzanya n’Igikomangoma gikekwaho uruhare mu iyicwa rya se) niwe wenyine ukiba muri Arabia Saoudite aho akora mu bijyanye n’amabanki I Djeddah. Abandi bavandimwe be batatu, umuhungu umwe n’abakobwa babairi bose baba muri Amerika.
Jamal Khashoggi ni umunyamakuru w’umuhanga wakunze kurangwa no kunenga ubutegetsi bwo mu gihugu cye ariko aba muri Leta Zunze Ubumwe za Amerika. Yishwe ku itariki 02 Ukwakira n’agatsiko k’abakomando bagera kuri 15 bari baturutse I Riyad muri Arabia Saoudite bajya muri ambasade y’iki gihugu muri Turkiya, aho basoreje umugambi wabo wo kwivugana Khashoggi barangije umurambo barawurigisa na n’ubu ukaba utaraboneka.
Nyuma yo guhakana kugira uruhare muri ubu bwicanyi, Arabia Saoudite yavuze ko ari igikorwa cyakozwe n’abantu itatumye barengereye. Urubanza rw’aba bantu bagera kuri 11 rwatangiranye n’intangiro y’umwaka imbere y’ubutabera bwa Arabia Saoudite, aho Umushinjacyaha mukuru yasabiye igihano cy’urupfu batanu muri bo.
Gusa, ngo haracyari urujijo ku ruhare rw’igikomangoma Mohammed ben Salmane ufatwa na Senat ya Leta Zunze Ubumwe za Amerika nk’uri inyuma y’ubu bwicanyi.
