Urukiko rw’umuryango wa Afurika y’iburasirazuba ruri i Arusha muri Tanzania, EACJ, kuri uyu wa 20 Nzeri 2022 rwatangiye kuburanisha abadepite bahagarariye ishyaka ODM rya Raila Odinga mu nteko ishinga amategeko ya Kenya, bigeze kwibasira ubutegetsi bwa Uganda.
Muri Kanama 2021, ubwo uruzinduko rwa Dr William Ruto wari Visi Perezida wa Kenya muri Uganda rwaburizwagamo, abadepite barimo Junet Mohamed uri mu bayobozi bakuru b’ihuriro Azimio la Umoja, bibasiriye Uganda, bayishinja kwivanga muri politiki yabo.
Depite Junet na bagenzi be barimo Opiyo Wandayi, Caleb Amisi, Jared Okelo, Antony Otieno, Fatuma Abdi na Millie Odhiambo batangaje ko Perezida Yoweri Museveni wa Uganda afitanye umubano wihariye na Dr Ruto witeguraga guhatana na Odinga mu matora, banamwita umunyagitugu.
Umushoramari wo muri Uganda witwa Paul Bamutaze uvuga ko afitanye umubano wihariye n’ishyaka riri ku butegetsi yahise atanga ikirego muri EACJ, ashinja aba badepite kwibasira ubutegetsi bwa Uganda no kugerageza guhungabanya umubano w’iki gihugu na Kenya.
Bamutaze asobanura ko ashaka kwereka aba badepite bo muri Kenya ko Museveni ari Perezida watowe n’abaturage, atari umunyagitugu nk’uko babitangaje. Ati: “Ntabwo ari umunyagitugu nk’uko byavuzwe na Junet Mohamed n’abandi.”
Uyu mushoramari, nk’uko ikinyamakuru Kenyans cyabitangaje, yavuze ko Museveni akwiye kurindwa hamwe n’ishyaka riri ku butegetsi, kandi ngo hakwiye kubaho kwigengesera kugira ngo hatabaho icyateza umwuka mubi mu bihugu biri muri EAC.
Bamutaze yasabye EACJ ko yahana aba badepite, kandi ngo yizeye ko ubutabera yifuza buzaboneka.
