Ngo kubera ubugome bukabije bwahungabanyije uburenganzira bw’Abagande hirengagijwe amategeko y’imbere mu gihugu ndetse n’amategeko mpuzamahanga, hari abavuga ko bitumvikana kandi nta n’akamaro ko guhana gusa Umuyobozi w’Urwego rw’Ubutasi bwa Gisirikare (CMI) Gen. Abel Kandiho, nk’uko Amerika yabikoze.
Uwitwa Kakwenza Rukirabashaija uvuga ko iki ari igitekerezo cye (Opinion) cyatambutse ku rubuga blackstarnews, avuga ko “Iyo hataba gutera inkungay’amafaranga n’ intwaro kwa Amerika igitugu cya Gen. Yoweri Museveni nticyari kubaho imyaka 35”.
Uyu akomeza agira ati “Mu gihe ibyaha by’ubutegetsi , gushimuta, iyicarubozo, n’iyicwa by’ abatavuga rumwe n’ubutegetsi bikomeje, ba shebuja ba Museveni i Washington bagomba guhana ubuyobozi bwose bw’igisirikare n’igipolisi muri Uganda. Abayobozi benshi barimo gukora cyangwa bakoze ibyaha Gen. Kandiho afite: iyicarubozo no kwica abaturage”.
Yongeyeho ko “Muri abo bagizi ba nabi harimo Gen Elly Tumwine, Gen. David Muhoozi, Gen. Muhoozi Kainerugaba, umuhungu w’umunyagitugu Gen. Museveni, Gen. Peter Elwelu, umubazi wa Kasese, n’Umukuru w’Igipolisi cya Uganda, Martin Ochola, Komanda mukuru, utanga amabwiriza ku byaha byose, Gen. Museveni na we agomba guhanwa.”
“Niba ba shebuja ba Museveni i Washington bahangayikishijwe cyane n’ihohoterwa rikabije ry’uburenganzira bwa muntu muri Uganda bagomba guhagarika kugaburira ku kiyiko ubutegetsi bwa Museveni babuha amafaranga n’abasirikare be intwaro.”
Avuga ko n’ubundi Amerika yavuze ko amatora ya perezida yo ku ya 14 Mutarama 2021 “atabaye mu bwisanzure, cyangwa ngo mu mucyo.” Yibaza impamvu niba Amerika ibona ubutegetsi bwa Museveni butemewe ikomeza kubuha intwaro.
Nk’uko iyi nkuru ikomeza ivuga, Rukirabashaija akomeza avuga ko ibyaha byo gushimutwa, iyicarubozo n’ubwicanyi bikomeje, ko ubwicanyi bwa Kasese bwa 2016 bwakorewe abantu barenga 150 harimo abana n’abagore butigeze bukorwaho iperereza. Ati “Museveni yiratiye gutegeka Gen. Elwelu gukora icyo gikorwa ndetse anazamura jenerali. Inkunga ya gisirikari hamwe n’imfashanyo zikomeje zifasha gukomeza ibyaha”.
Kandiho, Umuyobozi wa CMI
“Njye narokotse iyicarubozo mu biganza by’indiri za CMI. Ibihano kuri Kandiho biratoranijwe kandi ntibihagije. Abandi bayobozi bakuru bagomba gufatirwa ibihano nk’ibyo kandi kubera ko bakora ibyaha byibasiye inyokomuntu bagomba gukurikiranwa n’Urukiko Mpuzamahanga Mpanabyaha (ICC)”.
Yongeyeho ko ibindi bihugu bikomeye, harimo u Bwongereza hamwe n’ibihugu by’Ubumwe bw’u Burayi bikomeza ubutegetsi butemewe bwa Museveni bigomba nabyo gushyiraho ibihano no gusaba kubiryozwa. Ngo nibwo buryo bwonyine bwo kumenyesha ubutegetsi ko uko ibintu byakorwaga byarangiye.
