Igihugu cya Austria cyafashe icyemezo gikomeye cyo kwanga ko indege za gisirikare za Leta Zunze Ubumwe za Amerika zinyura mu kirere cyacyo zerekeza mu bikorwa bya gisirikare bigamije Iran.
Minisiteri y’ingabo ya Austria yemeje ko Amerika itazemererwa gukoresha ikirere cy’icyo gihugu mu bikorwa bifitanye isano n’iyi ntambara iri gukaza umurego mu Burasirazuba bwo Hagati.
Iki cyemezo gishingiye ku ihame Austria isanganywe kuva kera ryo kutabogama, ribuza iki gihugu kwinjira mu miryango ya gisirikare nka NATO cyangwa gushyigikira ibikorwa bya gisirikare by’ibindi bihugu.
Abayobozi ba Austria bavuze ko nubwo Amerika yagiye isaba uburenganzira bwo gukoresha ikirere cyabo inshuro nyinshi, buri busabe buzajya busuzumwa ukwabwo bufatanije na Minisiteri y’ububanyi n’amahanga.
Mu rwego rwa politiki, bamwe mu bayobozi b’imbere mu gihugu bagaragaje impungenge. Sven Hergovich, uyobora Ishyaka rya Social Democratic Party, yasabye ko Leta yakomeza kwanga ubusabe bwose bwa Amerika, avuga ko iyi ntambara ishobora guhungabanya umutekano n’ubukungu bw’u Burayi.
Austria si yo yonyine ifashe uyu mwanzuro. Igihugu cya Spain nacyo cyafashe icyemezo nk’iki cyo kubuza indege za Amerika kunyura mu kirere cyacyo zerekeza mu bikorwa bya gisirikare byo mu Burasirazuba bwo Hagati. Ibindi bihugu birimo France, Italy na Switzerland byo byashyizeho amabwiriza akomeye agabanya ubufasha bwa gisirikare.
Ku rundi ruhande, Ubwongereza bwemereye Amerika gukoresha bimwe mu birindiro byayo bya gisirikare birimo RAF Fairford na Diego Garcia, nubwo ivuga ko ibyo bikorwa bigamije kwirwanaho gusa.
Perezida wa Amerika Donald Trump yanenze ibi byemezo by’ibihugu by’inshuti, abishinja kudatanga umusanzu uhagije mu bikorwa byo guhangana na Iran.
