Itsinda ry’abanyeshuri biga mu Ishuri rikuru rya gisirikare muri Kenya bari mu ruzinduko rw’icyumweru mu Rwanda batangiye kuva tariki 11 Werurwe 2017. Iri tsinda rigizwe n’aba ofisiye bakuru baturuka mu bihugu bitandukanye bya Afurika bakurikirana amasomo ajyanye n’umutekano mpuzamahanga, imiyoborere y’abaturage, hamwe n’ubumenyi mu bya gisirikare.
Ku itariki 12 Werurwe 2017, aba banyeshuri basuye urwibutso rwa Jenoside ku Gisozi aho bunamiye inzirakarengane zishwe muri Jenoside yakorewe abatutsi mu 1994.
[xyz-ihs snippet=”google-pub”]
Naho ku itariki 13 Werurwe 2017 iri tsinda ry’aba ofisiye ryasuye icyicaro gikuru cy’Ingabo z’u Rwanda. Col Steven Radina waje ayoboye iri tsinda akaba yagiranye ikiganiro n’Umugaba Mukuru w’Ingabo z’u Rwanda, Gen Patrick Nyamvumba wamwakiriye mu biro bye.
Ku cyicaro gikuru cy’Ingabo z’u Rwanda, aba banyeshuri basobanuriwe imiterere n’imikorere y’Ingabo z’u Rwanda n’ibikorwa bitandukanye RDF igiramo uruhare byiyongera ku nshingano y’ibanze ifite yo kubungabunga umutekano n’ubusugire bw’igihugu. Aha twavuga nk’uruhare mu iterambere ry’igihugu hamwe n’ibikorwa byo kubungabunga amahoro hirya no hino ku Isi.
Col S Radina yashimye umubano mwiza uri hagati y’Ingabo za Kenya hamwe n’Ingabo z’u Rwanda. Yavuze ko u Rwanda ari urugero rwiza mu bijyanye n’ibya gisirikare hamwe n’iterambere ry’imibereho myiza y’abaturage. Col Radina yagize ati “U Rwanda ni igihugu dufatiraho ingero z’ibintu bitandukanye byiza bihakorerwa bishobora kutubera inyigisho zadufasha mu bihugu byacu nk’urugero urebye igenamigambi n’uburyo ibintu bikorwa, usanga hano ibintu biri ku murongo cyane”.
Mu cyumweru bazamara mu Rwanda bazasura bimwe mu bigo bya RDF birimo Amashuri Makuru ya gisirikare i Musanze n’i Gako mu Bugesera. Bazasura kandi Koperative ya ZIGAMA CSS hamwe n’Ikigo cy’Ubwishingizi mu kwivuza cy’Ingabo z’u Rwanda, MMI.
Uretse ibikorwa bya gisirikare iri tsinda ry’abasirikare rizasura na zimwe mu nzego za Reta harimo Minisiteri y’Ububanyi n’amahanga, iy’Ubukungu hamwe n’iy’Ubuhinzi n’ubworozi. Hanyuma basure n’inganda za Bralirwa n’urw’Inyange.
Uruzinduko rwabo bazarusoza ku itariki 18 Werurwe 2017.
Src:MoD
Kanda hano ujye ubona amakuru yihuse kandi kugihe kuri Facebook no kuri twitter
@bwiza.com
