Abagabo batatu bafatiwe hafi y’umupaka w’u Rwanda, Burundi na Congo basanganwe telefoni ngendanwa zirimo amakuru ngo y’ibitero byategurwaga mu gace ka Minembwe n’ibindi bikegereye bituwe n’Abanyamulenge.
Aba bagabo batatu bagaragara ku ifoto bashyizwe ku ngoyi, bafashwe n’igisirikare cya Repubulika Iharanira Demokarasi ya Congo (FARDC) bakaba baraganaga mu gace kabarizwamo inyeshyamba za RED-Tabara zikomoka mu Burundi.
Nk’uko ikinyamakuru Imurenge kibitangaza, aba bagabo ni Twahigize Ezechiel, Bisimwa Katabana na Pasiteri Mbeke Sadiki, bafatiwe ku musozi wa Kamanyola bagana mu misozi miremire y’i Uvira.
Umuvugizi w’igisirikare cya Congo muri aka gace, capitaine Dieudonné Kasereka, yatangarije iki kinyamakuru ko izi telefoni bafatanwe zari zirimo amabanga y’ibitero inyeshyamba za Red-Tabara zateganyaga kugaba ku baturage b’akarere ka Minembwe n’ahandi ngo hatuye umunyamulenge muri Congo.
Capitaine Dieudonné Kasereka akomeza avuga ko ibi bitero byari biteganijwe kugabwa bitarenze tariki ya 1 Ukuboza 2019.
Aba bagabo biregura, ngo bavuze ko bahawe imizigo bagomba kuyigeza ku abo igenewe (RED-Tabara) by’umwihariko ko batari bazi ibiyirimo ndetse ko batanazi uwabatumye.
Ikinyamakuru sosmedias cy’i Burundi cyo gitangaza ko umwe muri aba bagabo batatu ari umunyarwanda, bakaba bajyanwe gufungirwa i Bukavu banakorerwaho iperereza ngo hamenyekane ubakoresha.
