Kuri iki Cyumweru gishize, uwahoze ari Perezida wa Leta Zunze Ubumwe za Amerika, Barack Obama, yavuze ko yipimishije Covid-19 agasanga yaranduye nk’uko iyi nkuru dukesha AFP ivuga.
Obama yanditse ku rubuga rwa twitter ati: “Maze iminsi ibiri ndibwa mu muhogo, ariko numva mera neza.” Yongeyeho ko kugeza ubu umugore we, uwahoze ari umudamu wa mbere, Michelle Obama, yipimishije agasanga ataranduye.
Yanditse ati: “Jye na Michelle twishimiye gukingirwa no guhabwa urukingo rushimangira.”
Obama na bagenzi be bahoze ari ba perezida, Jimmy Carter, George W. Bush, Bill Clinton n’abahoze ari abadamu ba mbere, bagaragaye hamwe muri videwo y’umunota umwe yashyizwe ahagaragara muri Werurwe umwaka ushize, bashyigikira gahunda yo gukingira ya Amerika banibukiranya ibyo bakumbuye mu buzima bwabo bwa mbere y’icyorezo.
Muri aya mashusho, Obama yagize ati: “Uru rukingo rusobanura ibyiringiro.” “Bizakurinda hamwe n’abo ukunda iyi ndwara iteje akaga kandi irica.”
Muri Kanama, Obama yasubitse kwizihiza isabukuru y’imyaka 60 kubera ikwirakwira ry’ubwoko bwa Covid-19 bwiswe Delta.
.
